Diasabra y diadomingo di e fin di siman aki a tuma luga otro VacunaTHON dirigi na esunnan cu tin 60 aña bay ariba na Hotel Ritz Carlton pa di e manera aki nan por tuma e di tres dosis di vacuna contra Covid-19.
Durante e dos dianan aki e adultonan mayor a pasa busca nan prome of di dos dosis, asina como tambe e ‘booster shot’ si e adulto mayor tabata cumpli cu e rekisitonan pa bin na remarca pa esaki.
Pa nan busca e ‘booster shot’ e adulto mayor mester a ricibi e di 2 dosis (minimo 6 luna pasa of mas). Pa busca e ‘booster shot’ e adulto mayor di 60 aña mester a presenta cu su AZV y su carchi di vacunacion anterior of si no tabatin AZV un forma di identificacion legal, e mayoria adulto mayor cu a bin na remarca a ricibi un invitacion di DVG via Aruba Health app of via telefon pa acudi.
Ciudadanonan cu no tin 60 aña ainda pero debi na nan condicion di salud comprometi a ricibi un verwijsbrief di specialista tambe a pasa busca e ‘booster shot’, nan tambe a haci uso di e dos dianan aki pa pasa busca nan di 3 vacuna.
Bon Dia Aruba a tuma contacto cu Departamento di Salud Publico ayera diadomingo despues di 4.30 di atardi pa haya e ultimo cifranan di cuanto personanan den total a wordo vacuna den dos dia aki pero no a haya contesta te ciere di edicion aki. Nan ultimo rapport tabata di diasabra te cu 1or di atardi na unda nan a indica cu te momento ey 900 persona a vacuna, Bon Dia Aruba ta sigui warda riba e cifranan actualisa.
Omicron, variante di Sur Africa ta di preocupacion
Diahuebs di siman pasa a keda conoci un variante nobo cu a ser origina na Sur Africa cu tin e nomber di “Omicron”, na unda cu diferente paisnan incluyendo Merca a impone restriccion pa e biaheronan cu ta bin for di e region aki.
Organisacion Mundial di Salud (OMS) ta considera Omicron como un otro variante di preocupacion igualmente cu Delta y nan a pidi na e paisnan pa mehora nan esfuerso di vigilancia y secuencia pa compronde miho e variantenan di coronavirus.
Fabricantenan di vacuna a identifica e variante aki como un preocupacion, Moderna a señala cu Omicron ta representa “un riesgo potencial siginicativo” pa su vacuna contra Covid-19.
Den un comunicado nan ta señala cu “variante Omicorn ta inclui mutacion cu a ser observa anteriormente den variante Delta y cu nan ta kere cu por aumenta e transmision y mutacion cu a ser mira na variantenan Delta y Beta. E combinacion di mutacion ta representa un riesgo potencial significativo pa acelera e disminucion di inmunidad natural”.
Na Merca Omicron a haci su aparicion pa duna un golpi na economia, e variante nobo di Covid-19 a haci cu prijs di petroleo a cay cu 13% diabierna ultimo ya cu inversionistanan tabatin miedo di restriccionnan gubernamental nobo y un crecemento economico mas slow. E crudo Mericano a caba e dia ey den un minimo di dos luna di 68.15 USD pa 13.1USD pa bari, e pio dia cu a ser registra pa petroleo for di 27 di april di 2020, ora Covid-19 tabata prolonga di manera lihe na Merca.
“Nos ta compronde cu hende ta preocupa. E parti bon ta cu nos tin sistema di monitoreo na henter mundo pa detecta e variantenan aki hopi lihe, esaki a ser detecta haci un par di siman y cientificonan caba tabata comparti investigacionnan cu nos, informacion cu nos, asina cu nos por tuma medidanan” e lider tecnico di OMS pa Covid-19 Maria Van a señala den un comunicado.
“Ta importante como individuo minimalisa bo exposicion, e medidanan di distanciamento, bon uso di tapaboca cu e mannan limpi, evita espacionan yen di hende y haya e vacuna” Van a menciona.
Na medida cu mundo lo conoce mas riba e variante Omicron, e orientacion actual riba medidanan di prevencion, como uso di tapaboca por cambia.
Vooral ora pandemia por cuminsa yega na su fin y coronavirus por bira permanente, loke ta nifica cu por tin un permanencia constante pero no lo afecta un number grandi di personanan, ta probabel cu lo sigui surgi mas variantenan.
Cientificonan di BioNTech a cuminsa investiga e impacto cu e variante Omicron tin den vacuna Pfizer, den proximo simannan lo tin mas informacion riba esaki.
Ademas, Moderna den su mesun comunicado a informa cu “nan ta trahando di manera lihe” pa prueba e capacidad di su dosis di e vacuna actual contra variante Omicron y nan ta espera e resultadonan den proximo simannan.
Si e vacuna actual y esun di refuerso “booster shoot” ta insuficiente contra e variante, un posibel solucion ta pa vacuna tur e hende cu un dosis mayor, Moderna ta de proceso pa haya un candidato di refuerso specifico contra Omicron.
Minister di Salud di Sur Africa Joe Phaahla, di su parti a trece dilanti cu e restriccionnan di vuelo “no tin hustificacion, e reaccion di algun paisnan, den termino di impone prohibicion di biahe, ta completamente den contra di e normanan y standard recomenda pa OMS”.
