(AP)—Calculacionnan ta sugeri cu vacunanan ta funcionando bon den e temporada di griep actual na Merca. E vacunanan tabata rond di 40% efectivo den preveni adulto bira malo suficiente for di e griep cu nan mester bay dokter, clinica of hospital, segun oficialnan di salud a bisa durante un reunion di vacuna di e centro di control y prevencion di malesa (CDC) diaranson. Muchanan cu a ser vacuna tabatin 60% menos chens di haya tratamento na oficina di dokter of hospital, e oficialnan a bisa.
En general e oficialnan ta satisfecho si e vacuna contra griep ta entre 40 y 60% efectivo. E vacunanan sa funciona miho ora nan ta pas bon contra e variante di griep andante. Oficialnan ta bisa cu esaki ta loke a pasa durante e—relativamente tipico—temporada di griep aki.
Vacunanan di griep ta ser recomenda anualmente pa tur hende cu edad di 6 luna bay ariba na Merca. Aproximadamente mita di muchanan eligibel y net menos cu mita di adulto a haya vacuna di griep den e ultimo lunanan, segun data di CDC.
CDC ta uza varios sistema pa monitoria e vacunanan. Un di nan ta un network di hospitalnan cu ta ofrece informacion riba con bon e vacuna ta preveni malesanan relata na griep cu ta rekeri admision na hospital. Un otro ta basa riba data di pashentnan for di clinicanan di cuido urgente y departamentonan di emergencia na hospital.
Calculacionnan for di cuatro diferente sistema di monitorio a ser presenta na e reunion di un comite cu ta conseha e CDC riba vacunanan. E descubrimentonan a ser reporta como rangonan, pero nan averahe a keda na casi 40% pa adultonan y rond di 60% pa muchanan.
E calculacion di efectividad den adulto ta similar na loke CDC a reporta inicialmente pa e ultimo temporada di griep. E vacunanan a prueba di ta menos efectivo den algun otro temporada recien, e resultadonan influencia pa ki tipo di variante tabata dominante y con bon e vacuna tabata pas na dje.
Un miembro di comite a expresa decepcion na e descubrimentonan recien riba efectividad. “Ta parce cu tin menos resultado pa inmunisacion anual pa influenza,” segun Dr. Sarah Long di Drexel University.
Long a puntra si continuo vacunacion, aña tras aña, por resulta den menos reaccion di e sistema immuun. Un oficial di CDC a bisa cu algun investigadonan ta explorando e pregunta ey, te awo sin resultadonan conclusivo. “Un cos si cu ta parce di ta surgiendo consistemente for di e cosnan aki ta cu en general ta cu ta keda miho na bo pa bo haya vacuna en bes di no,” segun Dr. Lisa Grohskopf di CDC.
