Vacuna por yuda…No vacuna sigur cu no…

Den poco tempo nos a rush bay di menos di 50 caso activo di Covid-19 pa dia, pa casi mil ayera. ‘As we speak’ nos lo a cruza e limite di mil caso activo, pero cu rumbo desconoci; nos no sa unda e asunto aki ta bay termina. Mientras tanto ya caba hospital mester busca alternativa pa otro pacient, pa por atende esnan cu Covid. Y banda di reimposicion di uso di tapaboca y ora di ciere, no ta mira tanto ainda di mas medida. No cu lo mester bolbe na un lockdown completo, pero tambe den e caso cu no ta bay asina leu cu e medidanan concreto, nan por lo menos por laga nos sa pakico ta limita e medidanan na loke a haci te awor. Na nos pa huzga si loke a haci ta bon o insuficiente. Pero esey tur ta consideracion demasiado laat. Nos ta caba den un situacion cu ta sclama pa medida inmediato, sin cu necesariamente ta bay pa un toque de queda, por ehemplo. Loke si ta necesario ta cu nos mester por mira un lider den e asunto aki, pa indica unda nos ta y unda nos ta bay y pakico. Por lo pronto ta parce cu e negociacion pa yega na gobierno nobo ta mas importante.

Manera den cualkier situacion di emergencia, mester contesta e pregunta con grave e situacion ta. Un comparacion cu otro pais, den region y mas leu, no por falta. Berdad ta cu e veredicto Mericano cual pais ta cay den categoria 4, esun cora, no ta e unico criterio pero en todo caso ta indica algo. Den nos region tin den e categoria aki tin 11 pais, entre otro BVI, Colombia, Corsou, Costa Rica, Suriname, y US Virgin Islands. Tin hopi otro pais di region cu no ta riba e lista, anto tin algo cu nos no ta haciendo bon. A proposito, Hulanda tambe ta comparti e honor di ta riba e lista aki.

Pero aparte di e situacion, a surgi e controversia tocante vacuna o no vacuna. Manera na otro paisnan tambe a cuminza aki un discusion fuerte entre esnan cu ta pro vacunacion y esnan cu ta contra. Esnan pro ta mustra riba e hecho cu gran parti di e personanan cu ta haya Covid, y sigur awor cu e variante Delta, ta persona no vacuna. Y manera por deduci di informacion di exterior, persona vacuna ta core sustancialmente menos riesgo di contrae Covid, y si acaso nan haya esaki, e probabilidad cu nan salud ta keda afecta seriamente ta hopi menos. Di otro banda ta mustra riba e hecho cu hasta persona vacuna por haya Covid. Esey ta berdad pero ta logico tambe pasobra nunca ningun cientifico a logra ni a pretende di logra cu nan a descubri e remedi perfecto. Medicacion semper ta un asunto di introduci sustancia ajeno na curpa humano y den cierto cantidad di caso esey tin un efecto malo riba e persona, cu hasta por fayece di esaki. Realmente no ta mira pakico mester keda ripiti e argumentonan aki, mientras ta trata di hecho bon estableci. No ta aña pasa humanidad a cuminza deal cu enfermedad contagioso y den e busqueda di solucion medico semper tabatin remedi cu un porcentahe halto di exito y otro cu ta considerablemente menos.

Tambe awor e discusion ta bay den direccion di e pregunta si un gobierno por haci vacunacion obligatorio si of no. Regularmente ta surgi e argumento cu vacunacion ta mishi cu derecho sagrado di un persona pa dicidi riba su curpa y cu por lo tanto otro(nan) lo no por dicidi pa nan. Nos no ta asina sigur cu den un corte e argumento aki lo tin suficiente peso pa convence un huez, cu mester evalua si e bien comun tin asina tanto beneficio di vacunacion, cu e interes di e comunidad ta bay promer. Por referi na e articulo cu a aparece den Bon Dia Aruba ayera, unda ta trata di un sentencia di Corte Europeo pa Derecho Humano, pa nos tambe e instancia supremo den e tipo di caso aki. E Corte a dicidi cu den un caso di vacunacion di mucha cu interes di nan ta superior na e interes individual di e ciudadano y cu imposicion di vacunacion ta posible, inclusive sancion den caso di no cumplimento. Esey por ta e resultado aki tambe, si un caso manera esun na un empresa local, cu ta exigi di su empleadonan cu nan ta vacuna pa un cierto fecha, mester bay huez pa haya un veredicto.

E problema practico cu nos tin awor ta cu nos tin un situacion cu por sigui escala den direccion di e momento mas dificil di e crisis cu nos a pasa aden, cu tabata algo mas di 1600 caso na september aña pasa. E otro peak relativo di 700 caso activo na april nos a laga actualmente leu nos tras caba. Tin un cos sigur den e asunto aki: si logra detene e actual brote, esey lo ta danki na e miles di persona vacuna, y no na esnan cu pa cualkier motibo no a haci esey, ademas cu ta nan mayoritariamente ta yena hospital. E discusion tocante vacuna o no vacuna por bira uno inutil, pasobra no vacuna no ta duna ningun efecto positivo, y vacuna sí.