Awe mainta den un conferencia di prensa di Gobierno di Aruba, Crisis Team a duna di conoce cu e vacuna lo cuminsa yega otro siman. Alabes nan a haci un yamado pa comunidad registra na e plataforma Aruba Health App, pa asina comunidad por haya e vacuna mas lihe ora su grupo ta bin na remarca.

Asina a duna di conoce Sharline Koolman di Departamento di Salud Publico (DVG), ken ademas a menciona cu nan ta organisando tur cos pa esey por sali bon. Parti di e grupo cu ta atende cu e distribucion tambe ta haciendo su trabao cu e ultimo detayenan, pa asina otro siman Aruba por ricibi e prome lote di vacuna cu ta trata di 11.700 dosis.

Igualmente Koolman a trece dilanti cu ta importante pa comunidad en general y specialmente esunnan cu tin un edad di mas di 70 aña, cuminsa registra riba e plataforma Aruba Health App. Asina ora nan grupo ta bin na remarca, nan por haya e vacuna mas lihe sin warda mas tempo. Pa motibo cu segun Koolman mes a expresa, nan no ta desea pa tin e vacunanan warda den un freezer.

“Esey ta e manera con e persona por haya e vacuna, pero tambe por wordo registra na tur MFA si e persona ta desea di hacie di e manera ey” Koolman a sigura.

Tambe, el a afirma cu Departamento di Salubridad Publico ta haciendo e esfuerso pa haya mas tanto personal posibel pa administra esakinan.

El a splica cu un persona mester haya dos dosis di e vacuna pa asina por keda protegi totalmente. Lo administra e segundo dosis tres siman despues cu e persona a haya e prome dosis. “Pero no kere cu si bo ta haya e dos dosis bo por sali y sunchi tur hende. Nos tin cu wak con e vacuna ta cubri tur e variante cu ta existi na mundo”, Koolman a bisa.

Casonan importa ta aumenta

Garreth Tromp, epidemiologo di DVG, a informa cu e curva epidemiologico na Aruba ta bahando, loke ta nifica cu tin menos caso nobo pa dia compara cu loke tabata na comienso di aña, cu tabatin di haci cu e dianan di fiesta.

Di tasa di positividad, Tromp a informa cu e test cu ta sali positivo bao di tur test di esunnan cu ta asintomatico a baha y awor tin un averahe di 15%, loke ta nifica un señal, segun el a sigura. Pero ainda no a yega na 5% o menos, cu ta e cifra cu nan kier yega.

Igualmente, el a comenta cu e casonan importa ta aumentando. Y manera ta conoci, hopi di turistanan ta bin for di Merca, loke kiermen cu e gran mayoria di casonan importa ta bin di Merca. Despues ta sigui Hulanda, Colombia y Republica Dominicana.

Di loke ta trata e variantenan cu a wordo detecta na Aruba, Tromp a menciona cu akinan tin e variante B1.1.7, cu ta e Britanico y cu a wordo haya 10 biaha. Tambe nan a mira recientemente e variante B.1.429 di California, di e cual tres caso a sali positivo.

Di esaki, el a sigura cu ta casonan cu a wordo transmiti localmente, loke ta nifica cu e variantenan aki ta tumando luga na Aruba. Di e variante Britanico, Tromp a trece dilanti cu ta mustra cu ta un 30% mas infeccioso cu e variante cu nos a mira den tur tempo aki. Loke Tromp no a sigura ta si esaki ta mas mortal cu e otro. “Ainda ta mucho trempan pa bin un cu un indicacion di dje”. Di e variante di California, ainda nan ta wardando pa haya sa con hopi mas contagioso e por ta.

Tromp tambe a trece dilanti cu pashentnan cu tin un edad mas avansa ta esunnan cu ta drenta den e grupo di riesgo pa fayece di Covid-19. Un porcentahe hopi grandi den comunidad ta padece di malesanan cronico, por ehemplo, hipertension of malesa di curason, loke tambe ta aumenta e riesgo pa fayece di Covid-19.

Hotelnan ta ofrece servicio di test

Di otro banda, CEO di ATA, Ronella Tjin Asjoe-Croes a trece dilanti e resultadonan di luna di januari pa loke ta trata turismo. E desaroyo aki a trece resultadonan mas abao di locual nan a proyecta pa januari 2021. El a afirma cu e cantidad di turista ta menos cu na luna di december 2020 y e ta bao di scenario conservativo cu nan a stipula pa januari 2021, cu un total 31.368 bishitante.

El a declara cu e reto di mas grandi ta e anuncio cu na luna di januari a wordo haci pa CDC na Merca, unda cu manera a indica, nan a haci e rekisito di presenta un resultado di un prueba PCR negativo pa Covid-19 como un rekisito obligatorio pa por drenta na Merca.

E parti mas grandi cu ta wordo afecta, segun el a informa, ta pa esunnan cu ta bishita for di Merca y tin cu regresa na nan pais. Di esaki, Tjin Asjoe-Croes a bisa cu Aruba a ahusta e maneho di test y esaki ta den man di e cluster medico di Aruba. Y asina a acredita tambe diferente laboratorio pa amplia e oferta di test.

Ademas, hotelnan a introduci e servicio di duna e test aki y hotel mes tin e maneho, laboratorionan a habri un sucursal den area turistico pa esaki segun loke Tjin Asjoe-Croes a manifesta.

“Tur pa facilita e servicio na e bishitante y den algun caso tambe lokaalnan tambe pa nan por haci nan prueba”, el a declara.

Na e momentonan aki, practicamente tur hotel ta ofrece e servicio di test na nan huespednan na e hotel mes. Tjin Asjoe-Croes a menciona cu aworaki tin 23 localidad na Aruba unda cu un persona por haci su test cu ta necesario pa un biahe pa Merca.

Mirando cu esaki a conduci y lo sigui conduci pa mas casonan positivo na Aruba, el a afirma cu a amplia e capacidad di test. Pero tambe ATA ta monitoria otro aspecto cu tambe ta bin cune como consecuencia di e rekisito di Merca.

Por ehemplo, nan tin cu monitoria y nan ta sigura tambe cu nan tin suficiente acomodacion pa isolacion den caso cu bishitantenan ta test positivo na ora di salida y mester keda mas largo. Ademas nan ta den contacto cu companianan di seguro, mirando cu Aruba tin e seguro obligatorio di Covid-19 cu ta 30 dollar pa persona y lo cubri e caso positivo di un bishitante ora e ta bishita; pero tambe Aruba a dicidi cu e mesun prijs y mesun pakete ta cubri tambe e bishitante si na salida e ta test positivo.

“Nos ta monitoria esaki di cerca y e ta canando na ordo”, Tjin Asjoe-Croes a expresa.

Igualmente, el a bisa cu no mester lubida cu tambe ta enfrentando otro retonan. Por ehemplo Hulanda ta desmotiva pa biaha, Inglatera a pone mas medidanan adicional ultimo dianan aki y tambe Canada basicamente a pone un prohibicion pa biaha te cu fin di april, loke ta nifica cu esey lo causa un impacto riba loke nan ta espera di e proximo lunanan cu ta nos dilanti.