Durante e ultimo evento di Aruba Tourism Authority (ATA), su directora Ronella Tjin Asjoe-Croes, a presenta nan meta di crecemento di un 17.3% pa 2018 di bishitante for di Latino America (sin inclui Venezuela) dilanti nan socionan principal di e mercado aki cu a participa den LAPMA ( Latin America Planning Meeting di Aruba).
Sinembargo den seno di e reunion aki el a sostene algun combersacion riba e impacto den nos turismo cu e exigencia di e carchi geel ta treciendo cu esaki. “Esey ta afectando benta pa Aruba,” segun sra. Tjin Asjoe- Croes.
For di luna di maart ultimo, Aruba a dicidi di introduci e exigencia di e vacuna di keintura geel pa tur bishitante di e region aki y esaki ta afecta primordialmente e mercado aki. ATA ta mira den esaki un reto principal, ya cu nos pais ta bin cu e medida aki mientras cu otro pais turistico den Caribe, si no a bin cu e tipo di medida aki. Merca pa cierto mercado tampoco ta pidi e exigencia di e vacuna ey.
“Pues e hendenan no ta compronde dicon Aruba si. Dicon Aruba ta papia di cierto risiconan di salud.” Mientras cu tin mercado manera Hulanda, Merca, Inglatera, etc., cu no ta exigi esey.
Segun directora di ATA, e tipo di medida aki ta pone e hendenan duda dicon un Aruba ta introduci cierto medidanan manera e vacuna pa keintura geel y otro nan no. E logica ta cu si tin peliger otro paisnan mas grandi tambe lo a introduci un medida di e caliber aki. Esaki ta un punto cu nan kier trece na atencion di gobierno y ATA ta trahando riba dje pa e no stroba e desaroyo cu nos turismo tin creciente for di diferente mercado.
E asunto di e vacuna aki ta un reto clave pa ATA. Ya cu pa e turistanan ta keda un proceso basta largo pa cumpli cu e exigencia aki, y tin biaha nan ta prefera di no pasa den dje, y eligi otro destinacion. Esaki tambe tin su consecuencia, ya cu e ta haci nos mercadeo y promocion no efectivo.
Venezuela y eleccion na Colombia
Pero otro reto tin di haber cu e mercado di Venezuela cu ta representa un reto a base di volumen. Aruba a perde a base di ingreso un cifra ainda no precisa debi na e caida di e mercado aki cu tabata e di dos mas importante pa nos industria turistico. Pero ATA ta trahando pa compensa bon e caida aki cu otro mercadonan di e region aki.
Encuanto e proximo eleccion pa eligi un presidente nobo na Colombia, ATA tambe ta evaluando esaki, ya cu esaki ta forma parti di tur consideracion di e mercadonan cu nos producto turistico ta wordo propaganda y mercadea. Encuestanan na Colombia ta mustra dos candidato, un di derecho y otro di izquierda, ta esunnan cu mas opcion pa gana e eleccion aki, nan ta Ivan Duque y Gustavo Petro. Den su maneho di turismo, ATA ta tene cuenta cu diferente aspecto cu lo por afecta nos turismo, ya cu esaki ta loke nos ta bende. Den esaki nan ta tene cuenta kico ta e factornan cu ta contribui cu mas demanda of menos demanda pa asina cuminsa evalua su situacion local, segun sra. Tjin Asjoe-Croes.
“E situacion local di cada mercado ta wordo evalua debidamente y bo ta papia akinan di situacion politico, economico, confiansa cu e consumido tin y posibilidad cu e ta bay gasta den cosnan cu ta di luho y nos ta considera un vacacion algo di luho.”
Segun sra. Tjin Asjoe- Croes ta inevitabel cu nan ta evalua tur e aspectonan ey di tur mercado unda Aruba ta inverti pa asina nos por tuma e miho decisionnan tambe. Pa esun di Colombia te aworaki no tin preocupacion. Mientras cu e compania Avianca a anuncia vuelonan adicional fei Colombia, tambe tur e proyeccionnan ta mustra positivo for di e mercado aki.
