Asina a informa Sharline Koolman di Departamento di Salud Publico di Aruba na unda tambe a indica cu for di comienso e vacunanan aki ta disponibel y cu si un persona kier haya e unico dosis di dje tin cu haci un afspraak na DVG.
Na e momentonan aki, e mayoria di vacunanan cu ta wordo utilisa na Aruba ta di Pfizer y cu pa usa un vacuna Janssen di Jhonson & Johnson (J&J) tambe nan mester tene na cuenta cu mester tin mas persona cu kier haya e vacuna aki pa motibo cu si nan ta habrie nan lo por perde e resto di e vacuna.
“Segun mi ta 10 hende tin mester pa nan por habri e vacuna aki” Koolman a señala y tambe a sigura cu no tin mucho pedido pa e dosis aki, cu esey ta keda na decision di cada persona, cu nan como DVG no por scoge pa un hende vacuna cu J&J cu segun el a afirma, tambe el a indica cu ta 2.500 dosis cu Aruba a haya for di Hulanda y cu te ainda no a wordo usa hopi di dje, “ni 50 no a wordo usa ainda”, el a bisa.
Pa via cu e vacuna aki no ta wordo solicita hopi pa hende por haya e dosis di dje, Koolman a expresa cu nan tin un aproximadamente un aña pa por wordo usa “nos tin un aña di tempo cu nos por usa nan ainda, pero e ta keda na cada pashent kico e kier” .
