E vacuna produci pa compania Belga, Janssen, ta mustra un eficacia di 66 porciento pa un solo dosis. Esaki ta menos cu e otro vacunanan cu a aproba te awo, sinembargo, esey por resulta di tiki importancia.
E vacuna desaroya na Leiden bao compania mama Jonhson & Johnson ta parce di ta menos efectivo cu otronan. E prome vacuna cu a aproba, desaroya pa Pfizer/BioNTech, ta mustra 95 porciento di eficacia. E vacuna di AstraZeneca tin un eficacia averahe di 70 porciento, y esun desaroya pa Moderna ta mustra eficacia di 92 porciento. Diabierna, e compania basa na Merca, Novavax a anuncia cu e test di fase tres pa su vacuna a indica nivel di eficacia entre 86 porciento y 89 porciento.
Sinembargo, expertonan ta bisa cu esaki por no necesariamente ta un desbentaha. Den un entrevista cu EenVandaag, virologo Marjolein Kikkert a splica cu e mescla di diferente vacuna por de hecho ta un bentaha. “Mi ta kere ta hopi beneficioso cu pronto nos lo tin un set di vacuna cu cada un por tin su fortalesa y su debilidadnan pa asina nan por complementa otro.”
Un di e principal bentahanan di e vacuna Janssen ta cu e tasa di inmunidad di 66 porciento por ser logra cu solamente un dosis, mientras e otro vacunanan actualmente riba mercado ta rekeri dos dosis. Es mas, por warda e vacuna aki na cuatro grado, cual ta temperatura di frishider. “Logisticamente, esaki ta nifica cu lo ta mas facil pa distribui cu, por ehemplo, e vacuna cu mester warda na menos 80 grado”, Kikkert a splica.
E virologo a agrega cu mester compronde e porcentahenan aki den terminonan relativo. E ta argumenta cu dos tercio di e poblacion cu lo ricibi e vacuna di Janssen lo ‘bira completamente inmuun’. Pa e tercio restante, ‘lo reduci significantemente e riesgo di bira severamente malo’, e ta agrega.
E combinacion di varios vacuna por di e forma aki conduci na e meta desea di inmunidad di grupo.
