Cientificonan ta kere cu nan a haya un manera pa haci e vacuna di tuberculosis – un siglo bieu – hopi mas protectivo: Simplemente administra esaki den un forma diferente.
Den un estudio cu macaco, inyectando e vacuna directo den sanger dramaticamente a aumenta su efectividad compara cu e hangua bou cuero di awendia, segun investigadonan a reporta diaranson.
“Esaki ta duna speransa”, maske ta rekeri mas estudio di siguridad prome cu test e maneho den hende, segun Dr. Robert Seder di National Institutes of Health, un autor senior di e estudio.
Tuberculosis ta mata alrededor di 1.7 miyon persona pa aña, mayoria den paisnan pober. E unico vacuna, yama BCG, ta uza principalmente den areanan di riesgo halto pa protege baby di un forma di e malesa. Pero e ta hopi menos efectivo pa protege adolescente y adulto di e menasa principal, esta tuberculosis den pulmon.
Mayoria di vacuna ta hangua den musculo of cuero. Seder a bin cu e idea di inmunisacion IV algun aña atras, cu experimentonan mustrando un candidato pa vacuna di malaria tabata traha miho ora inyecta den e ader.
Investigadonan na NIH a join Universidad di Pittsburgh pa studia algun macaco rhesus, cu ta reacciona na infeccion di tuberculosis hopi similar na hende. Nan a test un variedad di manera pa administra e vacuna, incluyendo inhalacion.
Seis luna despues di e vacunacion, e investigadonan a pone bacteria di tuberculosis directamente den pulmon di e animalnan, y a check pa infeccion. Macaco cu a ricibi e vacuna standard actual bou cuero, hasta cu un dosis mas halto, tabata apenas un tiki mas protegi cu animal sin vacuna, y e inhalacion tampoco tabata mucho efectivo.
Pero den 9 di 10 macaco, un dosis mas halto cu normal inyecta den un ader a traha hopi miho, e investigadonan a reporta. E team no a haya rastro di infeccion den seis di e animalnan, y a conta nivelnan hopi abou di bacteria den pulmon di tres di nan.
E hipotesis ta cu celnan clave den inmunidad – yama T cells – mester yena e pulmon pa mata bacteria, y por haci esaki mas rapido ora por hiba e vacuna rapidamente rond di e curpa a traves di sanger. En berdad, testnan a demostra mas T cells activo den e pulmon di macaco vacuna di e forma nobo.
E hallazgo ta impactante, demostrando cu con administra un vacuna ‘claramente ta afecta inmunidad’, specialistanan di tuberculosis di Universidad di Massachusetts, Samuel Behar y Chris Sassetti a skirbi. Sinembargo, nan a adverti cu no ta mesun facil pa administra un vacuna IV cu di otro forma.
Seder a bisa cu investigacion adicional pa siguridad ta na caminda cu animal, cu speransa di cuminsa e prome estudio cu hende den alrededor di 18 luna.
