Debi na demanda grandi
Segun Departamento di Salud Publico, e cantidad substancial di personanan cu a acudi pa vacuna contra keintura geel no por a wordo premira. Aki tres siman lo tin vacuna obtenibel atrobe.
Siman pasa Departamento di Salud Publico a anuncia cu entrante 1 di maart lo cuminsa controla tur turista cu ta procedente di paisnan endemico pa keintura geel riba nan prueba di vacuna. Despues di e anuncio aki, seccion di malesanan contagioso na departamento di Salud a ricibi hopi hende cu a bin busca e vacuna preventivamente. “E cantidad di persona cu a acudi no por a wordo premira mirando cu añanan anterior e demanda pa e vacuna aki bao di nos residentenan no tabata asina halto”, e departamento a laga sa.
Demanda grandi
Mirando e demanda grandi, seccion di malesanan contagioso a conclui cu ta bay tin mester mas vacuna. Pues a cuminsa tuma contacto mesora cu organisacionnan internacional di salud y tambe paisnan den Caribe pa sondea posibilidad pa cumpra mas vacuna.
Pero lamentablemente no a logra esaki riba termino corto segun departamento di Salud Publico. E vacuna contra keintura geel no ta uno facil pa haya debi na e diferente epidemianan cu tin. Esaki ta haci cu e proceso pa haya vacuna bek na Aruba lo tarda tres siman. Departamento di Salud Publico ta premira cu mas tarda fin di maart of poco mas trempan lo tin e vacuna disponibel atrobe. “Manera esaki sosode nos lo informa comunidad mesora riba esaki.”
Conseho
Aña pasa nos a trece dilanti cu mundialmente tin un scarsedad di vacuna contra keintura geel. E demanda pa e vacuna aki ta creciendo, esaki pa motibo cu diferente paisnan tin esaki como exigencia pa por drenta e pais. Ta conoci cu na Aruba den temporada di vakantie di scol hopi di nos hendenan ta bay cu vakantie, tambe na e paisnan cu ta exigi vacuna contra keintura geel, segun e departamento. Esaki ta haci cu e demanda na Aruba pa vacuna contra keintura geel mescos cu otro parti mundo tambe ta subi.
Seccion di malesanan contagioso ta conseha tur persona cu ta bay biaha pa paisnan unda cu tin keintura geel pa proteha nan mes via di uza repelente contra sangura regularmente y tambe pa bisti paña cu manga y pia largo. Si na bo regreso bo presenta sintoma di keintura, acudi cerca bo dokter di cas mas pronto cu ta posibel. Pa mas informacion por tuma contacto cu seccion di malesanan contagioso na departamento di Salud Publico.
