(NLTimes) – E vacuna basa riba proteina contra di coronavirus yama Novavax awo ta disponibel na Hulanda.
“E vacuna di Novavax por ta un alternativa pa e personanan cu te ainda tin duda pa cu e vacunacion cu e vacuna cu ta usa e tecnologia vector or mRNA,” instituto di salud publico RIVM a bisa riba nan website.
Hendenan cu kier ricibi e vacuna di Novavax por crea un afspraak cu GGD via telefon. E vacuna di Novavax ta contene particulanan chikito di e proteina di e coronavirus, cual a ser crea den laboratorio. Tambe e ta contene un aditivo cu ta aumenta e curpa su respuesta inmunologico pa cu e vacuna. E curpa lo produci anticurpanan contra di e proteina despues di e inyeccion. Si e curpa despues drenta den contacto cu e virus SARS-CoV-2, e sistema inmunologico lo reconoce e proteina y cuminsa produci anticurpanan pa combati esaki, RIVM a splica.
European Medicines Agency (EMA) a aprova e vacuna Novavax aña pasa. Su eficacia ta comparabel cu e vacunanan di mRNA traha pa Pfizer-BioNTech y moderna, y Janssen su vacuna cu tecnologia vector. Pa proteccion optimal, cu e vacuna di Novavax e personanan lo ricibi 2 dosis cu 3 siman entre nan. E vacuna te ainda no a keda aproba pa un booster shot.
