Vacation Rentals Professionals Aruba (VRPA) ta un asociacion cu ta defende y representa interesnan di e propietarionan di vacation rental na Aruba na unda cu awe mainta nan ta bay haci un conferencia di prensa pa reacciona riba e reciente comunicado cu minister di Asuntonan Economico, Geoffrey Wever a haci tocante un studio cu ta bay cuminsa pa midi impacto di ‘vacation rental’ na Aruba.
Nan a informa cu den ultimo añanan industria di vacation rental na Aruba a crece y a bira un pilar importante den industria di alohamento, tocante esaki, nan ta menciona cu nan ta bay cuminsa un plan di accion di un lista di recomendacionnan cu a wordo investiga di vacation rental responsabel y sostenibel na Aruba cu e fin cu e industria aki lo sigui prospera.
Igualmente, nan ta sigura cu den e puntonan cu nan ta bay trece dilanti den e conferencia ta specificamente e reaccion di nan riba e comunicado di prensa cu minister Geoffrey Wever a publica tocante un estudio cu ta bay cuminsa pa midi e impacto di vacation rental riba e cantidad di casnan pagabel pa localnan.
Den e publicacion ta indica cu “cada cas cu wordo ofreci como “vacation rental” ta nifica cu tin menos pa nos propio localnan. E cantidad di casnan obtenibel pa localnan ta baha door cu personanan – cu no ta biba na Aruba – ta cumpra casnan den zona residencial cu e meta di haci esaki un “AirBnB”. Cu menos cas obtenibel door di e desaroyo aki pero cu un demanda grandi pa cas, e prijs pa cas ta sigui subi y bira impagabel pa nos mesun hendenan. Esaki ta stroba nos localnan di yega na nan propio cas.”
Igualmente ta señala cu “esaki ta un desaroyo preocupante y cu tin e atencion di gobierno di Aruba. Door di falta di informacion y maneho riba “vacation rental” priva, Minister Geoffrey Wever su peticion na Conseho di Minister a wordo aproba pa asina cuminsa un estudio pa midi e impacto economico, social y pa sociedad di “vacation rental” na Aruba. E estudio esencial aki, fase 1, lo wordo ehecuta prome y basa riba e resultado di fase 1, fase 2 lo bira un conseho riba un maneho concreto y inclusivo.”
Ta trece dilanti cu “desaroyo sostenibel ta encera un sociedad inclusivo den cual cada persona por participa y logra su metanan. Cada local mester por yega na su propio cas. Garantisa acceso na cas adecua, sigur y pagabel pa un y tur, Sustainable Development Goal 11, ta un condicion necesario pa desaroyo sostenibel. Mi ta sigur cu e estudio aki lo duna nos e informacion relevante pa traha maneho na beneficio di y eleva calidad di bida di nos ciudadanonan,” minister Geoffrey Wever a bisa.
