Arkeologonan a descubri e evidencia directo mas antiguo di hende humando marihuana, na un tumba 2,500 aña bieu den west di China.
Den un compleho di tumba den e Pamir Mountains – un region cerca di e frontera di China, Pakistan y Tajikistan moderno – excavadonan a haya 10 baki palo y varios piedra conteniendo residuo kima di e mata di cannabis. Cientificonan ta kere cu tabata uza piedranan cayente pa kima e marihuana, y hende tabata inhala e huma como parti di un ritual di entiero.
“Ta e evidencia fuerte mas bieu di hende birando halto” cu marihuana, segun Mark Merlin, un botanista na Universidad di Hawaii. E no a participa den e investigacion, publica ayera den Science Advances.
E historia di uzo di droga antiguo pa largo a intriga eruditonan. E historiado Griego, Herodotus, a skirbi di hende na Asia Central humando cannabis cerca di 440 B.C. Den siglo pasado, arkeologonan a haya simia y mata di cannabis dera den tumba a traves di e teranan di Asia Central, incluyendo sur di Siberia, y otro luganan den region di Xinjiang na China.
Awendia, eruditonan no ta considera storianan antiguo como confiabel sin evidencia pa confirma. Y mirando cu mata di cannabis tin otro uzo – ta primi e simia pa azeta, y e fibranan ta uza pa paña – e presencia di simia so no ta confirma uzo di droga.
Uzando tecnicanan nobo pa analisis kimico, e cientificonan di e estudio a examina e residuo, y a haya evidencia di THC, e compuesto cu ta duna marihuana su ‘high’. Mayoria di mata di cannabis salvahe tin nivelnan abou di THC, pues investigadonan ta kere cu hende cu a construi e tumbanan deliberadamente a selecta of cultiva e matanan cu cantidad mas halto.
“Durante ritual funerario, e huma por a purba pa comunica cu mundo spiritual – of cu e hendenan cu nan tabata derando”, segun co- autor Yimin Yang di Universidad di Academia di Ciencia Chines na Beijing.
Excavacion di e sitio, yama Santana di Jirzankal, a cuminsa na 2013. E compleho di tumba tambe a contene otro obhetonan cu investigadonan ta kere a wordo uza den ritual funerario, incluyendo fragmentonan di paña di seda y harpa. No a revela analisis di DNA di e simianan antiguo cu lo sugeri nan origen.
Dorian Fuller, arkeologo y botanista na University College London, kende no a participa den e estudio, a yama e hallazgo ‘hopi emocionante’.
“Algun di e artefactonan ta di Asia Central y otro di China Central”, el a bisa. “E ta recorda nos cu e region aki tabata den centro di Asia na e momento ey.”
