Gobierno y Parlamento di Aruba su negligencia pa bin cu un maneho defini of cambio di ley riba uzo di productonan traha a base di marihuana pa fin medicinal, ta trece hopi bruhamento y impacto grandi riba tereno di husticia y salud publico.
Ta existi un dobel moral rond di e tema aki den nos pais. Mientras cu nada ta wordo defini pa bin cu regulacion riba e tereno aki, afo e consumo di marihuana ta grandi, specialmente cerca nos hobennan. Ademas, productonan of remedinan traha a base di cannabis of marihuana ta wordo bendi di contrabanda riba nos isla.
Den e articulo aki Bon Dia Aruba ta referi na tres fuente: Reclassering, FADA y Departamento di Inspeccion di Remedi pa nos por haya un bista mas amplio rond di e topico relaciona cu consumo di marihuana y productonan deriva di e mata aki como producto natural y medicinal.
Reclassering y FADA
Cannabis of marihuana ta wordo uza directamente como yerba manera fundacion Reclassering a revela cerca mayoria di e hobennan cu a cay den delincuencia pa baha stress. P’esey Reclassering kier bin cu un programa den grupo ambulante di tres luna pa hobennan cu ta uza droga.
E fundacion aki ta indica cu un 80 pa 90% di hobennan cu ta haya nan mes den problema cu husticia ta uza of ta adicto ta marihuana. Marihuana ta wordo uza bou di e hobennan como un medio pa trankilisa/relax/chill, baha nervio. Den e programa den grupo lo enfoca pa duna e hobennan otro instrumentonan pa por trankilisa sin marihuana y tambe haci nan consciente di e consecuencia a termino largo.
Den combersacion cu Bon Dia Aruba, director di FADA Judel Sprok ta bisa cu marihuana ta wordo propaganda afo como “un droga cu ta calma bo, cu ta medicinal y cu ta cura diferente sorto di malesanan. Y nos hobennan loke ta conveni nan ta gara”.
Pero di otro banda e ta admiti cu tin diferente producto traha a base di marihuana den forma di crema, te, etc.. cu tin beneficio medicinal. Pero e parti caminda e hoben ta uza marihuana den forma di humamento como parti recreacional, “esey sigur niun instancia renombra rond mundo cu nos a traha cu ne no a bisa cu esey ta algo positivo.”
Un punto cu ta trece bruhamento bou nos hobennan ta cu nan ta hopi riba Internet y eynan tin hopi mensahe cu ta bisa cu marihuana ta algo natural y bon. E tipo di mensahe aki ta stimula e consumo di e yerba aki cerca nos poblacion hubenil. Ademas e presion y propaganda cu ta hayando mas forsa riba uzo di marihuana como algo natural, e ta hopi halto na Aruba, segun director di FADA.
Combina cu alcohol
E problema cu e fundacion aki ta mira cu hopi biaha e uzo di marihuana ta wordo combina cu esun di alcohol. Ora cu e hoben tin hopi tempo uzando e combinacion aki, e chens ta grandi cu e curpa ta bira resistente y bo kier algo mas fuerte.
“Ora e chens ta grandi cu bo ta salta bay den droga mas pisa”, sr. Sprok ta splica. Sin duda –segun presidente di FADA- marihuana tin su riesgo, pero no por descarta cu tin beneficionan medicinal.
“Esey ta algo cu mester wordo atendi entre e medico y e pashent.”
FADA como fundacion anti droga y alcohol su mensahe ta uno claro riba e efecto malo di marihuana cerca nos hobennan.
Inspeccion di Remedi
Cualkier cu ta e motibonan, uzo di remedinan of cualkier producto produci a base di cannabis of marihuana, ya sea remedinan of crema homeopatico of natural como remedi alternativo of no convencional pa calma dolor, no ta legal na Aruba, segun departamento di Inspeccion di Remedi.
Roselynn Angela di Inspeccion di Remedi, ta bisa Bon Dia Aruba cu actualmente no tin legislacion cu ta permiti e uzo di substancia of producto asina.
Pa esaki por tuma luga libremente mester bin cu un amienda of cambio di ley. Pero prome mester bin cu un comision pa evalua den ki circunstancia y bou cual indicacion e tipo di producto aki traha cu marihuana ta wordo uza, segun sra. Angela.
E ta indica cu esaki lo resulta den un maneho nobo di parti di gobierno cu lo por haci uzo di marihuana legal; pero pa parti medico. Igualmente di otro banda tambe ta depende di gobierno si ta permiti e consumo di marihuana como algo recreativo.
Como medicina
Pero di banda di departamento di Inspeccion di Remedi nan ta mas estricto riba e uzo di marihuana como medicina of remedi den cuadro di nos legislacion actual. Sra. Angela a declara na e matutino aki cu tin otro paisnan unda a wordo aproba caba marihuana pa multiplesclerosis.
Igualmente como un tratamento alternativo pa cancer, specialmente pa calma e dolor cerca e pashentnan. “Pero na Aruba te ainda no tin un indicacion di bisa pa haci’e.”
Segun departamento di Inspeccion di Remedi no tin niun importado di remedi cu a yega di acerca e departamento aki pa bin cu e tipo di remedi traha a base di marihuana na Aruba. Pero nan a yega di confronta situacionnan di pashentnan of turistanan cu ta bin di afo cu mirando cu den nan pais e ta regula, nan kier uza e productonan aki na Aruba. Pero te ainda nos ley no ta permiti pa turistanan tampoco bin cu e tipo di producto aki; of pa e hendenan aki importa nan di afo.
Investigacion pa regula uzo legal
Ya caba hopi pais a bin cu nan regulacion riba e uzo di marihuana cu fin medicinal, pero na Aruba te ainda nos no a yega asina leu. E echo aki ta haci un poco mas dificil e situacion di e pashentnan of usuario di e tipo di remedi aki pa tin acceso of haci uzo di dje libremente.
Sra. Angela ta bisa cu tin cierto investigacion haci cu ta demostra cu e tipo di producto aki lo por yuda. Pero esaki ta depende di e maneho di cada pais. Como un experto riba e tereno aki, e ta considera cu ta existi otro productonan legal cu ta mas pisa cu marihuana cu ta regula caba, pa ehempel e morfina cu ta wordo uza como tratamento pa maneha dolor.
Pues no mester descarta un cambio riba nos legislacion cu lo por trece flexibilidad riba uzo di remedi a base di marihuana pa cierto casonan specifico.
“Si tin un regulacion di dje y tin su base, ya cu a wordo haci investigacion y analisis cu ta comproba pa esey, pa kico no duna e pashent loke e mester.” Pero e ta afirma cu esaki mester ta un decision na nivel di gobierno, ya cu e ta algo complica.
Encuanto e producto cu ta wordo traha cu e hennep di cannabis segun sra. Angela tin definicion den nos legislacion cu ta regarda uzo di remedi cu ta bisa cu niun cos, ni sikiera simia di e mata aki, no mag di importa. Pues ta existi un prohibicion pa esaki tambe.
Tampoco ta existi excepcion den nos legislacion cu ta permit di un forma of otro uzo di cannabis como materia prima pa produci remedi. “Te ainda no tin niun regulacion cu ta permiti esey.”
