Uzo di autonan electrico ta hayando mas acogida na Aruba

ORANJESTAD – E autonan no convencional cu ta traha cu coriente ta hayando mas y mas aceptacion riba nos isla, asina Rubiela Lampe di e compania ActivatedPower a declara durante un conferencia di prensa cu a tuma luga na Hamaka Sidewalk Cafe.

Nan ta un compania nobo cu ta promove y comercialisa e uzo di autonan electrico riba nos isla haciendo uzo di e diferente marca auto cu ta produci e tipo di auto aki na un prijs rasonabel y competitivo.

“Nos ta wak hopi bentaha den auto electrico. Nos tin esun di e compania mes pa hopi luna, y bo ta wak cu bo ta spaar hopi placa. Y esey nos kier pa mas hende por spaar hopi placa”, el a bisa. El agrega cu e auto aki ta e resulta mas faborabel ya cu e number di auto ta mas barata (90 florin pa aña), mantenemento ta mas barata, bo ta spaar riba uzo coriente den luga di di gasolin. El a bisa cu tur hente kier baha su gastonan y esaki ta un manera pa haci esey y sinembargo core confortabel.

“Nos a haya hopi acogida… ya nos a bende un par di auto caba cu ta coriendo riba caminda caba”, Lampe a bisa. Nan a cuminsa recientemente cu un lote di seis di e tipo di auto aki, caminda un a wordo bendi y tres a wordo reserva wardando pa aprobacion di banco”  Rubiela Lampe a declara.

Source: Bon Dia Aruba