No a duna Edmond Croes ningun concesion na Ayo Rock Formation. Despacho di Prome Minister Evelyn Wever Croes a desmenti e rumornan cu tabata core den fin di siman cu e trabaonan di embeyecimento di Ayo Rock Formation ta na beneficio di e sostenedo di partido MEP y ruman di Parlamentario Endy Croes, esta Edmond Croes.
Manera ta conoci, Gobierno a anuncia un inversion di mey miyon florin pa mehora e facilidadnan di Ayo Rock Formation, un area hopi popular pa turista y local. Pero, no tin ningun plan pa un bar, ademas lo sera parti di e transhi cu a cay den otro.
E otro rumor cu tabata core ta cu Gobierno lo inverti den un caminda pa yega e beach di Andicuri. Esaki despues cu doño di e tereno a sera e pasada pa trafico di motor. Motibo di e decision tabata cu uso si control, particularmente door di tournan di UTV a destrui e luga.
Riba e pregunta si ta berdad cu Gobierno ta bay inverti 1.5 miyon pa habri otro ruta pa yega na e beach, no a haya contesta ainda. En todo caso, e plannan aki no tabata anuncia pa Gobierno.
Habitantenan di Ayo y Santa Lucia ta preocupa cu e informacionnan aki pasobra nan ta hayando hopi molester di stof y zonido di UTV, manera tabata e caso cu habitantenan na San Fuego. Bon Dia Aruba a compronde cu e habitantenan ta tuma paso pa uni, pa asina hunto por bringa e molester cu e vehiculonan aki ta causa na personanan cu ta biba den e area.
