Utilities Aruba N.V. ta prepara pa tuma e pasonan urgente y necesario pa trece un solucion sostenibel pa e problema di deterioro y falta di capacidad pa purifica awa sushi na e plantanan di RWZI.

Reunion cu Stakeholders

Ya pa algun luna caba Utilities a reuni extensivamente cu stakeholdernan clave y relevante pa trata e situacion critico aki na RWZI. Entre otro a reuni cu sector turistico, gubernamental y economico. Tambe a prepara un plan di contingencia pa unabes cu RWZI wordo traspasa legalmente pa e entidad nobo Aruba Wastewater Sustainable Solutions N.V., nan por cuminsa ehecuta e plan y tuma accion. E trayecto aki tambe ta encera establece relacionnan cu expertonan internacional pa duna apoyo na e proceso di soluciona e problema existente cu metodonan moderno y tecnologia lider.

A informa stakeholdernan di e inversion grandi cu lo mester wordo haci pa adkiri un planta completamente nobo pa soluciona problema di capacidad, pa awor y e siguiente 20 aña. Parti di e condicionnan pa e traspaso di e infrastructura di RWZI na AWSS ta pa cumpli cu normanan minimo pa purificacion di awa sushi y tambe duna un contribucion na nos medio ambiente door di elimina riesgonan di contaminacion di nos lamanan y tambe mantencion sostenibel di nos “wetlands” na diferente partinan di nos isla.

Añanan di negligencia

Manera ta conoci, Aruba su poblacion y turismo a crece rapidamente durante ultimo decadanan cual a haci cu e produccion di awa sushi y e demanda pa purificacion a crece substancialmente. Pa añanan largo e planta di RWZI no a ricibi su debido inversion y mantencion y pa es motibo, awe Aruba ta confronta cu e problema aki.

Na momentonan aki e planta di RWZI mester pasa door di un expansion y mehoracion di infrastructura urgente. No solamente pa e cantidad di awa sushi cual e mester purifica pero tambe pa mitiga y despues caba cu e molester di holor desagradabel, musca y sangura. E ta representa actualmente un riesgo inaceptabel pa salud publico, nos medio ambiente, nos sector turistico y nos economia.

Inversion

Na e momentonan aki ta wardando pa e ley pasa pa haci posibel e traspaso di e planta di RWZI y tambe garantisa e entradanan pa e entidad nobo, cu lo haci posibel pa financia e costonan operativo y inversionnan.

Segun analisis profundo y extenso ariba tur a factornan relaciona cu RWZI y rekisitonan cu mester cumpli cune, e ley cu mester wordo introduci ta hasi posibel un operacion sostenibel y eficiente.

E entrada ricibi lo ta destina pa garantisa cu tin recursonan necesario pa renoba, expande y mantene e planta di purificacion di awa, cu lo wordo traspasa pa y maneha pa ‘Aruba Wastewater Sustainable Solutions’ (AWSS N.V.).

E prome parti di financiamento ya ta cla pa cuminsa. Institucionnan financiero local y regional ya caba ta na altura di e necesidad di inversion y a expresa interes na duna apoyo pa cu e proceso aki.