Usuarionan di ATV’s y UTV’s ta keda causa daño na naturalesa

Pa hopi tempo caba ciudadanonan y organisacionnan ta expresa nan disgusto pa e daño cu e ATV’s y UTV’s ta causa na naturalesa, pero asina mes companianan ta keda ofrece excursionnan nan turistanan usando e tipo di autonan aki sin tene consideracion cu e daño cu nan ta ocasiona.

Mediante un video publica ariba su pagina di Facebook, Sr. Greg Peterson, a mustra con e guianan turistico ta mustra e turistanan con pa haci “spinning” cu e vehiculonan aki. Mientras cu e turistanan tambe ta purba haci esaki na e mesun sitio y despues e actividad ta bolbe ripiti cu e siguiente grupo di turista na e mesun localidad.

Peterson ta remarca cu antes tabatin 13 nido di shoco riba e tereno aki y aworaki no tin niun.

El a indica cu antes tabatin hopi Patrishi tambe riba e tereno aki, aworaki tampoco no tin niun. Tur esaki debi na e destruccion cu e vehiculonan aki ta causa.

“Mi no sa si nan a ricibi un certificado di destruccion di naturalesa. Talbes nos mester organisa eventonan di premio pa e tipo di prestacion di calidad aki tambe?,” el a cuestiona.

El a remarca cu e stof di e “spinning” cu e turistanan ta haci no ta bay solamente riba e casnan bunita na Tierra del Sol y cercania, pero tambe e ta bay den e awanan di costa den e area ey.

“Kende ta tuma nota di e estado di nos coralnan rond di e area ey? DNM, FPNA, Scubble Bubbles, AMMF? Ultimo biaha mi a tende cu ta parti di nos parke marino y recientemente a ser nomina como un Sitio di Humedal di Ramsar.Bo no ta pensa cu ta tempo cu nos producto di turismo keda un tiki mas cariñoso, respetuoso y responsabel? Por fabor considera. Lo wordo aprecia pa hopi. Haci’e pa e muchanan,” el a señala.

Varios ciudadano a comenta ariba e publicacion aki expresando tambe nan disgusto y alabes tristesa pa e situacion cu ta keda bira pio y cu naturalesa ta esun cu ta sufri como resultado di esaki.

“Cada dia dos biaha pa dia pa XXX cantidad di companianan di turismo… unda sea bo ta mira e deterioro—costa norte, Arashi, Bushiribana, Malmok … esnan sinta riba nan stoel importante no tin ni idea y no ta importa mientras nos ta hayando placa,” un usuario a comenta.

Mientras otro a indica: “Durante e ultimo 10 aña, especienan di planta a desaparece, especienan di insecto a desaparece, e Vesper a desaparece den e area aki. E unico shoco cu bo ta mira aya ta riba e jeep di safari di Palm Tours… hipocritanan.”