Presidente di Asociacion di Dokternan di Cas (HAVA), Joaquin van Trigt, a laga sa cu te aworaki tin suficiente test pa confirma e casonan potencialmente sospechoso di coronavirus. Tambe nan tin un plan di contingencia, cu mas test na caminda pa Aruba, pues no mester tin motibo di preocupacion actualmente.
El a bisa cu nan tin e material suficiente, pero nan mester usa nan strategicamente y nan mester ta hopi selectivo den nan uso. Na e momento aki nan ta scoge pa test e personanan cu tin sintoma, y si nan ta den un grupo di riesgo cu a bin for di exterior y cu por bira fuente di contagio principal di e virus. E ta reitera cu si bo no tin sintoma no ta bale la pena pa bo test. El a splica cu e motibo tin di haci cu na momento cu bo no tin e sintomanan, e chens ta hopi grandi cu e test lo sali negativo. P’esey nan ta scoge pa e hendenan cu tin sintomanan so.
