Na 1960, FDA (Food Drug Administratin) a aproba e uso di e pildo pa evita di haya yiu miho conoci como “the pill.” E efectonan lateral di e pildo aki a baha considerablemente debi na e uso di menos cantidad di hormona. Pero inicialmente e uso di e pildo aki tabata trece hopi efecto cun’e.

E pildo

E pildo aki ta pildo anticonceptivo cu dosis hopi abao di hormona pa evita un embaraso no desea. E ta traha di diferente manera pa preveni esaki. Algun di e pildo ta evita cu e ovario los e webo cada luna, si no tin ovulacion no tin risico di embaraso. Algun pildo ta haci e mucus cu e cervix mas diki loke ta crea un muraya pa sperma di hende homber drenta. Tin otro pildo cu su manera di traha dor di preveni cu e webo ta implanta den e utero y ta evita e fertilisacion y tambe tin pildo cu tin tur e efectonan aki hunto pa evita un embaraso no desea.

Dependiendo di e dosis di hormona cu tin den e pildo, esaki por wordo clasifica como dosis halto, dosis normal, dosis abao y ultra abao. Tur pildo ta un combinacion di e hormona femenino estrogeen y progesterone. Un pildo di dosis halto ta contene mas of menos 50 mcg di strogeen y un cantidad chikito di progestin tanten cu un pildo di dosis ultra abao ta contene menos cu 20 mcg di estrogeen y progestin.

E pildonan di dosis abo ta wordo receta mas frecuente cu es nan di dosis halto pa via cu nan ta produci menos efectonan lateral. Sin embargo e pildo di dosis abao tambe ta wordo receta pa otro cosnan diferente di evita embaraso, manera pa regula e periodo di menstruacion den hende muhe cu nan ciclo ta basta iregular. Tambe por wordo usa pa tratamento di sangramento pisa durante e menstruacion y pa muhenan cu ta bay haya e menopausa pa evita tur e sintoma nan indeseabel di dje.

Uso

E pildo anticonceptivo mester wordo tuma tur dia. Nan ta bini den paki di 21 of di 28 pildo. Tin hende cu ta cuminsa bebe e pildo e prome diadomingo despues cu e regla a kita. Ta logico cu por cuminsa cualkier otro dia, pero mester sigura cu ta mantene e mesun schedule pa e lunanan siguiente, bebe e pildo pa 21 dia sigui y despues stop pa e siguiente shete dia, bo lo haya bo regla ora bo ta sin bebe e pildo.

Despues cu e regla ta kita bo ta cuminsa cu e ciclo di e otro luna. Algun hende muhe ta opta pa bebe es nan cu ta bini den 28 pa no perde e ritmo di bebemento di pildo, di e 28 pildo aki 21 ta contene hormona y e otro shete no ta contene nada. E idea ta pa e hende muhe keda cu e custumber di bebe pildo tur dia di luna. Si un hende muhe ta lubida bebe un pildo di dosis abao, e chens di Sali na estado ta grandi pa via di e cantidad asina chikito di hormona. Pa e motibo ey e persona mester keda constante bebe tur dia y preferibel na mesun ora di dia.