Uso di blaas den aire liber ta prohibi pa ley

Diamars tabata dia cu diferente scol secundario a anuncia e lista di graduadonan pa aña escolar 2023-2024. Sigur un dia di hopi celebracion na diferente parti di e isla y manera ta custumber mayor- y familiarnan ta decora nan auto pa celebra e logro di e studiante, pero tin cu a lubida cu no mag di usa blaas den aire liber.

Manera ta conoci caba uso di blaas of confetti di plastic den aire liber ta prohibi pa ley. Minister di Transporte, Integridad, Naturalesa y Asunto di Adultonan Mayor, Ursell Arends, a tuma nota di esaki y a traves di un publicacion ariba su pagina di Facebook a haci un yamada na tur ciudadano pa no lubida cu esaki ta prohibi pa ley.

“Pabien na tur studiante cu a gradua! Un apelacion pa celebra den un manera responsabel y respetuoso! Nos ta ricibiendo diferente imagen di uso di blaas den aire liber, tin cu ta hasta bula bay. Nos kier recorda tur ciudadano cu segun Articulo 55A di Algemene Politieverordening (APV), ta prohibi di usa of laga bay, blaas of confeti di plastic den aire liber,” e mandatario a indica den su publicacion.

El a agrega cu ademas cu esaki ta contra ley, e blaas por causa daño na naturalesa y si esey ainda no ta un motibo cu por convence un persona, el a resalta cu mester corda y pensa riba e riesgo cu coriente por bay pa motibo di blaasnan cu ta pega den kabelnan di coriente, manera cu a sucede algun biaha den lunanan anterior.

Minister Arends, contestando un comentario di un usuario cu ta cuestiona si e tin fiesta na su cas si e no mag di usa blaas, a splica cu e prohibicion di blaas den aire liber ta pa proteha e medio ambiente y bestianan. El a indica cu aunke cu tin bon intencion ora cu ta usa blaas, no tin ningun garantia cu e blaas lo keda den e tereno di cas ya cu biento y otro factornan por laga e blaas bula bay facilmente causando riesgo grandi pa e animalnan marino y di tera.

Na Aruba el a bira un tradicion cu na final di temporada di examen pa studiantenan cu ta bay gradua, scolnan secundario ta haci un evento of actividad grandi pa anuncia e studiantenan cu a gradua exitosamente.

Cada scol ta haci esaki na nan propio manera y pa uni na e celebracion mayornan, famia of studiantenan mes ta skirbi riba e glasnan di e auto y ta decora esaki tambe, mayoria di biaha cu blaas. Mester recorda cu esaki no ta psoible mas y cu ta contra ley pa haci esaki.