Despues di 10 aña, artista Curasoleño Levi Silvanie ta bolbe cu un album y un mision nobo: “usa mi musica y storia pa empodera otronan cu ta sufri den silencio”. Diabierna 14 di April venidero, Silvanie lo duna un presentacion na Cas di Cultura (CdC). Na October e aña aki e lo lansa un proyecto pa conscientisacion di salud mental, cu enfoke riba hobennan di scol secundario na Aruba, Boneiro y Corsou.

Un den cada cuatro persona ta experiencia problema cu salud mental of un enfermedad mental. Mitar di tur caso ta cuminsa na of prome cu edad di 14 aña, y suicidio pa motibo di depresión ta e di 4 causa di morto mas comun den esunnan entre 15 cu 29 aña di edad. Den nos comunidad, problema cu salud mental masha poco ta wordo reconoci of papia, y hopi bes ta wordo mira manera un berguensa. Esaki por descurasha hende di papia tocante nan salud mental of busca ayudo.

gs’me:miss

gs’me:miss ta Silvanie su prome album den dies anja. Un obra fragil di 13 cantica den cual e ta habri su mes tocante su bida, su lucha, y crecemento. E album ta pinta un imagen conmovedor di e evolucion di Levi Silvanie for di ‘djis mi mes’ pa ’gs’me:miss’; for di su subida pa fama y su bataya cu salud mental, te na descubri con pa keda fiel na su mes.

Inspira pa e batayanan personal aki, Levi a cuminsa un movemento dos aña pasa cu e focus riba salud mental pa hoben y adulto. Usando gs’me:miss como herment, el a desaroya un programa exitoso pa trece empoderamento musical na scolnan, companianan y casnan.

Presentashon na Aruba y Korsou

Diabierna 14 di April di 7’or pa 9’or di anochi, Levi Silvanie lo duna un presentacion musical na CdC. Tin cupo pa no mas cu 100 persona. Pa cumpra karchi por tuma contact cu CdC na www.casdicultura.aw, manda un e-mail na info@casdicultura.aw, of yama 582 1010.

‘The School Tour’ ta bin bek!

Despues di un pilot exitoso na April di 2022, The School Tour lo bolbe bek e islanan ABC den e aña escolar 2023-2024. E tour aki tawata inicialmente planea pa tuma lugar e luna aki, pero pa motibo di un cantidad grandi di aplicacion di scolnan y studiantenan y e consecuencianan logistico, esaki a wordo posponi pa October 2023. Cu e School Tour y su album nobo, Silvanie kier usa e poder di musica pa inicia combersacion habri tocante salud mental y cuido personal. Un experiencia inmersivo den cual e ta comparti su musica y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel.

Danki na e apoyo di Minister di Educacion y Deporte di Aruba, Universidad di Aruba/Shoco Wellness, Medwork, y otro partidonan, The School Tour lo bini Aruba pronto. Banda di e sesionnan pa scolnan, lo tin session pa mayor y pa hende homber tambe. Cada sesion di The School Tour lo inclui un Health Pavillion, den colaboracion cu profesionalnan local.

E Health Pavillion lo tin un variedad di profesional di salud y bienestar unda bo por haya asistencia di biaha y ricibi informacion. Ora ta trata cuido di salud, semper tin espacio pa mehora. Pa es motibo lo tin un ‘open panel discussion’ tambe pa papia tocante e retonan actual na Aruba y posibel solucionnan.

Participacion na tur e eventonan di The School Tour lo ta completamente gratis, pero registracion ta necesario. Tur scol secundario na Aruba por registra prome cu dia 1 di Mei 2023, via e website levisilvanie.com/schooltour of por manda un e-mail na production@levisilvanie.com.

E meta ta pa jega na mas hopi studiante posibel. Pa sostene The School Tour, por manda un e-mail na management@levisilvanie.com pa mas informacion tocante sponsoring y donacion. Pa otro pregunta por e-mail management@levisilvanie.com.

Pa mas informacion tocante The School Tour, bishita levisilvanie.com/schooltour.