Secretario di Estado Mike Pompeo a anuncia ayera cu Estadonan Uni ta suspende e Tratado di Arma Nuclear Intermedio, un pacto clave cu Rusia, cu tabata un piesa central di siguridad Europeo desde era di Guera Friu.
“Pa hopi aña, Rusia tabata viola e condicionnan di e tratado di Arma Nuclear Intermedio, sin remordimento,” Pompeo a bisa, papiando na Departamento di Estado. “Rusia su violacionnan a pone miyones di Europeo y Mericano den riesgo mas grandi.”
“Ta nos obligacion pa responde adecuadamente,” Pompeo a bisa, añadiendo cu Merca a duna amplio tempo na Rusia pa bolbe na cumplimento.
E suspension anticipa pa basta tempo, cu a haci cierto preocupacion surgi encuanto un carera armamentista nobo cu Moscu, y cu a pone e aliadonan Europeo riba alerta, lo ta bira efectivo desde ayera. Anuncio di Pompeo ta inicia un periodo di 180 dia pa completa e retiro, a menos cu Rusia ta bolbe cumpli cu e acuerdo di 1987.
Presidente Donald Trump y su funcionarionan principal tabata dunando señal pa varios luna caba cu nan tabata na punto di retira di e tratado, cual Merca ta acusa Rusia di ta violando desde 2014.
“Estadonan Uni a cumpli completamente cu e tratado pa mas di trinta aña, pero nos lo no keda mantene nos mes na su condicionnan mientras Rusia ta gaña encuanto su accionnan,” Trump a bisa den un declaracion ayera. “Nos no por ta e unico pais na mundo cu ta unilateralmente mara na e tratado aki, of cualkier otro.”
Rusia y Merca ta e unico dos partidonan den e tratado aki, pero e ta afecta Europa significantemente.
E misilnan crucero cu carga nuclear, cu ta cay bao di e acuerdo bilateral aki, por bula entre 310 pa 3.100 miya, haciendo nan un menasa pa Europa, cu ta apoya Merca den su accion, aunke tin poco optimismo cu ta bay logra salba e tratado.
Den un declaracion, Organisacion di e Tratado di Atlantico Norte (NATO) a bisa cu e aliadonan di Merca ta ‘apoya completamente’ e decision di Merca, pa motibo di e menasa di Rusia pa siguridad Euro-Atlantico, y su rechaso pa duna cualkier respuesta creibel of tuma cualkier paso den direccion di cumplimento completo y verificable.
NATO a urgi Rusia pa usa e proximo seis luna pa ‘bolbe na cumplimento completo y verificabel pa mantene e Tratado’.
