Senado Mericano a yega ayera na un votacion pa retira ayudo Mericano pa e guera na Yemen, dirigi pa Arabia Saudi, un medida cu ta contene un respuesta di e parlamento Mericano pa e supusto responsabilidad di Arabia Saudi pa e asesinato di e periodista Jamal Khashoggi.
Senado a aproba tambe un resolucion separa condenando e asesinato di e periodista, despues cu e senadornan a lidia cu e pregunta con pa contesta riba e asesinato. Funcionarionan di inteligencia Mericano a conclui cu e principe heredero Saudi Mohammed bin Salman por lo menos tabata sa di e plan, si e no a ordena esaki, pero presidente Trump no tabata mustra disposicion pa culpa e principe.
Senadornan ayera a vota 56 contra 41 pa pone presion pa Merca termina su apoyo militar na Arabia Saudi den e guera cu e pais ta dirigi na Yemen. Senadornan tabata hopi rabia pa e asesinato di e periodista y tambe e reaccion di Cas Blanco riba esaki, y e resolucion ta ser mira como un señal di advertencia na e aliado Arabe. Otronan ya caba tabatin nan obhecion pa e apoyo na e guera na Yemen, unda gruponan di derecho humano ta señalando violencia indiscrimina cu ta afecta grandemente e poblacion civil, victima di bombardeo y enfermedad.
Si e resolucion di senador Republicano Bob Corker haya aprobacion den Camara di Representante, e lo sigui pa presidente Trump, cu por haci un di dos cos: firma e documento y scoge banda di Congreso; of veto e resolucion y tuma parti pa Arabia Saudi. Lider di mayoria Republicano den Camara no tabata disponible pa contesta pregunta di prensa riba su posicion.
