“Presidente Donald Trump lo biaha diahuebs venidero pa sur di e pais pa bishita e area di frontera, pa reuni cu esnan cu ta den e prome linea di e crisis di siguridad nacional y humanitario. Pronto lo anuncia mas detaye,” vocero Sarah Sanders a duna di conoce riba su cuenta na Twitter.
Despues cu den e ultimo dianan presidente Trump a vocifera mas di un biaha su disposicion pa declara un emergencia nacional a traves di un orden ehecutivo, pa por yega na e fondonan pa construi e muraya desea entre Mexico y Merca, awor e biahe anuncia ta parce di ta intenciona pa accentua e urgencia nacional cu Trump ta señala. E mandatario di e manera aki ta pretende di sali di un situacion di desacuerdo cu e Democratanan den Congreso, loke a provoca e actual ciere parcial di gobernacion federal, cu ta bay 17 dia caba.
Ademas di insinua cu e por declara un emergencia nacional pa haya e fondonan, Trump a comenta tocante e posibilidad cu e muraya na frontera no mester ta di concreto, sino por ta di staal tambe.
E actitud firme di Trump pa cu construccion di e muraya, un di su promesanan di campaña, cu de paso lo a ser paga pa Mexico, a hib’e den un confrontacion grandi cu e democratanan cu desde siman pasa ademas ta domina den e Camara di Representante, cu consecuencia cu desde 22 di december parti di gobernacion federal no tin acceso na placa pa opera.
E paralisacion administrativo ta afecta agencianan di dies departamento di gobierno, incluyendo Transporte y Husticia; como tambe decenas di parke nacional, cu ta un gran atraccion turistico.
