(ElPais/AP) – E compania di producto di higiene Johnson & Johnson ta centro di un polemica, despues cu diabierna pasa a bira conoci cu e empresa tabata sa mas di 40 aña pasa cu su talconan tabata contene cantidadnan chikito di asbest.
E corant Spaño El Pais a referi na un investigacion di agencia Reuters, cu a recopila varios memo y informe confidencial di e compania den cual ta comproba cu e compania tabatasa di e presencia di asbest, materia cu ta provoca cancer, den nan productonan.
E informacion di agencia Reueters ta sostene evidencia di presencia di cantidad chikito di asbest den su productonan desde 1971. E empresa multinacional tabatin varios huicio colectivo di hende muhe cu a alega di ta victima di uso di productonan di e companiaa. Tambe tin mas di 10.000 demanda ainda pendiente especialmente relaciona cu su producto Johnson’s Baby Powder.
Inmediatamente e asunto tabatin repercusion pa e anotacion di accion di e compania riba bolsa, cu un caida di 10% riba bolsa di Wall Street. E caida mas grandi den 16 aña ta ocasiona un perdida potencial di 40 biyon dollar na capitalisacion via mercado. E compania ya caba ta suheto di miles di demanda pa supuesto causa di cancer di ovario di usuario di su productonan. Johsnon & Johnson ya caba tin condena pa paga mas di 4 biyon dollar den 22 caso di cancer asocia cu uso di su talco.
E compania a apela e caso. Igualmente e caso na Los Angeles unda corte a concede na un muhe cu cancer di ovario un ompensacion di 417 miyon dollar, unda cu e compania atrobe a apela, e biaha aki cu exito. E tempo ey e abogado di e compania, Bart Williams, a bisa cu ‘ciencia a impone’. Ta parce cu diabierna pasa na Wall Street e skepticismo di e inversornan a impone.
