Inmigrantenan a bay den welga di hamber den curso di luna pasa pa protesta contra e condicionnan den e facilidadnan di detencion, haciendo cu oficialnan na un facilidad na Texas a duna nan alimentacion forsa, cu tubo di plastic via nanishi, asina The Associated Press a haya sa.
Tin mas detenido cu ta nengando cuminda na e centro na El Paso cu den cualkier otro facilidad di ICE, y abogadonan ta bisa cu cierto detenidonan ta perdiendo peso rapidamente despues di no come o bebe den 30 dia. Detenidonan, un familiar y un abogado a conta AP cu casi 30 hende homber na e centro di detencion di ICE na El Paso, mas tanto di Cuba y India, tabata na welga pa protesta contra loke nan ta yama abuso verbal y menasa di deportacion di guardianan. Nan ta rabia tambe tocante e tempo largo cu nan ta cera mientras ta warda riba proceso legal.
ICE a confirma ayera cu tin 11 detenido na El Paso cu ta riba welga di hamber, loke ta significa cu nan a nenga nuebe cuminda consecutivo , y adicionalmente cuatro mas na e centronan di ICE na Miami, Phoenix, San Diego y San Francisco, di acuerdo cu vocero di ICE, Leticia Zamarripa.
Na mita di januari, dos siman despues cu nan a stop di come, un hues federal a autorisa alimentacion forsa pa algun detenido na El Paso, segun Zamarripa. E no a referi na e acusacionnan di e detenidonan di abuso pero a bisa si cu e Centro di Procesamento di El Paso ta monitorea e cuminda y bebida di e detenidonan di cerca pa proteha nan salud y siguridad.
E hombernan cu tubo den nan nanishi tin sangramento persistente di nanishi y ta saca varios biaha pa dia, segun Amrit Singh, cu tin dos sobrino di India, estado Punjab, cu tabata riba welga di hamber pa un luna.
