Un homber na Texas a fayece di un explosion di un ‘e-cigarette’ cu a destrui su arteria mayor di su nek.
Oficina di ‘Medical Examiner’ di Tarrant County a bisa cu William Brown a fayece na hospital di Fort Worth dia 29 di januari. E certificado di fayecimento ta bisa cu el a muri di infarto cerebral despues cu partinan di e ‘vape pen’ cu e tabata usa a corta su ader.
E explosion a tuma luga dia 27 di januari, den e parking lot di un tienda cu ta bende articulo di humamento y di ‘vaping’. E manager di Smoke and Vape DZ a conta prensa cu el a yama ambulance despues di e explosion. Brown a drenta den e tienda pa pidi ayudo cu su vape pen, pero no a cumpra nada, segun e manager. E tienda no tabata bende e marca di pen cu e tabata usa.
Brown a ser hiba hospital cu urgencia y x-ray a mustra cu parti di e artefacto tabata pega den su garganta. “E cos di tres parti ey a bay den su garganta y a keda ey,” su wela Alice Brown a conta prensa.
E-cigarette y ‘vape pen’ ta artefacto opera pa un bateria cu ta keinta un likido pa crea un aerosol cu bo por inhala manera huma di sigaria. E likido normalmente ta contene nicotina y por tin sabor añadi, segun Centres for Disease Control and Prevention (CDC).
Tabatin 195 caso separa di e-cigarette cu a pega candela o a explota na Merca reporta pa medionan entre 2009 y 2016, segun un informe di US Fire Administration.
Na mei ultimo, un homber na St. Petersburg, Florida, a muri a consecuencia di un explosion di e-cigarette y cu a manda un parti den su cerebro.
