(AFP/Infobae) – Cu cadena na enkel y pols y sin feter den nan sapato, un fila largo di homber y muhe ta spera riba e pista di aeropuerto mientras agentenan ta rista nan pa ta sigur cu nan no tin nada scondi den nan boca.
Despues un pa un nan ta subi e trapi di avion cu a lease di un compania comercial. Ta trata di un vuelo pa deporta persona maneha pa ICE Air. E ocupantenan ta perde nan cadena ora nan yega El Salvador y nan ta haya nan feternan di sapato atrobe.
Un division no tanto conoci di e servicio di Inmigarcion y Control di Aduana, conoci pa su siglanan na Ingles, ICE, ta opera centenares di vuelo pa aña transportando hende deporta. E vuelonan aki ta un gran negoshi: gobierno Mericano a gasta aproximadamente 1.000 miyon dollar na esaki den ultimo decada y gobierno di Trump ta desea di aumenta su presupuesto cu 30% pa e vuelonan aki.
E avionnan ta transporta inmigrante deteni di un ciudad di Estadonan Uni pa otro y, ora tin orden di deportacion, pa nan pais di origen. Como 100.000 persona ta regresa nan pais riba e vuelonan aki tur aña. Si e Mexicanonan generalmente ta ser transporta via aire pa ciudadnan den sur di Merca y di eynan via tera pa frontera, e Centroamericanonan ta bay mas tanto cu avion.
Segun registro di e actividad aereo, e vuelonan cu hende deporta cu ta bay Guatemala y Honduras a aumenta hopi e aña aki. Y ICE a pidi un aumento di 30% den su presupuesto pa e vuelonan aki compara cu aña pasa. E organismo ta calcula cu aña pasa a gasta US$7.785 pa ora den e vuelonan aki.
ICE a cuminsa lease avion priva como 10 aña pasa, despues di tabata uza avion di gobierno mes. Nan ta bisa cu e uzo di avion priva ta scapa nan como 25 miyon dollar pa aña y ta duna nan mas flexibilidad.
