Usa auto menos… Traha mas na cas…?

Hulanda ta campeon di Europa den cantidad di auto compara cu poblacion. Aña pasa, manera por lesa den un articulo den e edicion aki, e cantidad di auto a crece te 9,4 miyon, riba un poblacion di 17,8 miyon. Un auto riba cada 1,8 persona, bisa 1 auto pa cada dos persona. Esey lo no impresiona nos tanto, pasobra na Aruba nos ta yega na: 70.000 riba 106.000 habitante, un auto riba cada 1,5 persona… O nos por bisa tambe alrededor di 660 auto pa cada mil habitante, loke ta e standard cu ta usa riba internet. Cu esaki nos ta cay tras di San Marino (1263), Monaco (899), y Merca (795) pa cada mil habitante, pero no pa tanto tampoco.

Nos por tuma esey como muestra di nos prosperidad? O e cantidad impresionante aki ta señal di un necesidad pasobra no tin otro opcion den nos situacion di transporte? Na Hulanda, por ehemplo den e dianan aki cu a sali e cifranan di aumento di auto na 2023, inmediatamente ta aparece e comentarionan tocante e problemanan creciente cu tin den transporte publico, cu por lo pronto ta parce di bira mas complica so. Expectativa ta cu pa 2030 lo yega na 10 miyon auto di transporte personal, mientras cu awor caba e problemanan riba e rutanan principal ta birando cada dia mas grandi. E problema na Hulanda no ta solamente e densidad enorme di trafico den e centronan urbano principal, sino tambe e creciente aumento di auto den e distritonan rural, unda concentracion di servicionan publico y imposibilidad di aumenta transporte publico den e partinan mas aleha, ta haci cu hende ta bira mas dependiente di auto. Por ehemplo, tin menos tienda y servicio medico den e regionnan aki, cu ta haci cu mester di un auto pa yega unda e servicionan ey ta localiza awendia. Esey ta implica cu no ta cuestion solamente di prosperidad cu ta haci cu hende ta cumpra mas auto, sino cu e ta birando mas un necesidad na unda no tin tanto alternativa di transporte publico.

Tur esaki ta un bon momento pa nos compara cu nos situacion na Aruba. Muy probablemente, si bo encuesta hende na Aruba tocante nan opinion si nan realmente mester di un auto, mayoria lo cuminza hari. “Unda bo kier mi yega anto, sin auto?”, lo por ta e pregunta retorico cu lo bo haya. Esaki ta en berdad refleha e situacion, unda e transporte publico disponible ta hunga un papel hopi limita, sin cu ta mira tanto perspectiva pa mehora esaki. Aki tambe nos ta mira cu e no ta un problema cerca nos so, sino cu na otro pais, manera Hulanda, tambe ta resulta dificil pa mehora transporte publico, na un manera rentable, den e distritonan mas aleha.

Na Aruba e asunto ta mas grave si, pasobra nunca tabatin un politica pa mantene e poblacion mas tanto posible dentro, y alrededor di e casconan urbano existente. Loke a sucede ta cu a ‘habri man laga bay’ den otorgamento di tereno pa traha cas, sin mucho planificacion urbano. E daño ta haci caba, cu e agravante cu nos ta yegando na final di e disponibilidad di tereno (publico) den loke ta e distritonan mas aleha. Ademas nunca tabatin un maneho consistente den purba yena e miles di tereno den e centronan urbano cu ta para bashi, tin vez hasta pa varios decada. Honestamente, nos mester duna credito na e anterior director di Departamento di Infrastructura y Planificacion, cu a aborda e tema aki algun tempo pasa, mustrando riba e necesidad pa usa e terenonan bashi den e casconan urbano di Playa y San Nicolas. Mientras tanto, su persona a ser kita di e puesto na DIP, sin cu ningun dia a haya un splicacion ta kico a sucede ey, pero esey ta tema pa otro dia.

En todo caso, cu e situacion actual cu nos tin un poblacion relativamente chikito, plama riba alrededor di 100 km², nos no ta mira con pa organiza transporte publico viable y pagable. Esaki lo significa anto cu na Aruba tambe, mescos na hopi otro pais, prospero o menos prospero, segun cu e ciudadano ta mira posibilidad di cumpra un auto, e ta haci esey.

Pakico no ta traha mas for di cas?

No ta necesario pa acepta e actual situacion, sin mira alternativa. Si nos a siña algo positivo durante e crisis di Covid, ta cu hopi trabao no ta requeri presencia di hende na pia di trabao. Claro cu esey no ta conta pa esnan cu pa indole di nan trabao lo mester t’ey. Pero ta keda un parti considerable di persona cu bien por opera for di nan cas, loke por reduci uso di auto pa yega trabao. Ta remarcable con, no solamente na Aruba, sino na otro pais tambe despues di e crisis di Covid hopi empresa a bolbe na ‘business as usual’ mientras cu nan por opera for di cas, sigur parcialmente, de paso reduciendo gasto di oficina tambe. Esaki di berdad ta un oportunidad perdi, en todo caso menos probecha, di e actual era di digitalizacion den cual nos ta biba. Esaki lo tin un efecto positivo riba importacion di combustible, pasobra e demanda lo baha. Tambe por pensa riba un sistema general di transporte escolar, pa reduci e trafico di miles di mayor cu ta mainta y merdia riba caminda pa hiba y busca yiu di scol.

Finalmente, pakico nos no ta tende nos mandatarionan papia di e asuntonan aki? Nan tin miedo cu nos no ta comprende e tipo di maneho general aki?