Dia 13 di maart ultimo a decreta estado di emergencia sanitario ora cu a detecta cuatro caso di COVID-19 na Uruguay y for di e momento ey tin 845 caso positivo y 23 persona fayecido.
E cifra aki ta relativamente abao compara cu e resto di paisnan di Latino America. Na mei a cumpli cu tur obhetivo marca pa gobierno y a recupera un cierto grado di normalidad, loke a provoca e interes di e resto di e paisnan.
Luis Lacalle Pou, presidente di Uruguay, a dicidi di tuma un serie di medida pa detene e transmision di coronavirus na e pais. Un di e medidanan mas importante tabata e suspension di les na tur scol y universidad. Tambe Gobierno a crea e Fondo Coronavirus y a baha cu 20% e sueldo di minister-, funcionarionan publico y priva. Empresanan di alimentacion a aporta alimentonan y 100 miyon dollar.
Den e casi tres luna aki, Gobierno no a decreta un cuarentena stricto pero a conseha e poblacion pa permanece den cas y sali solamente si tin algun necesidad basico, por ehemplo, haci compras of bay botica. “Nos region a bira e epicentro di Covid1-9 y a adverti riba habrimento di actividadnan hopi lihe”, Carissa Etienne, director regional di Organisacion Mundial di Salud (WHO) pa America y director di Organisacion Panamericano di Salud (PAHO) a comenta.
Uruguay ta conta cu un bon sistema di salud, compara cu otro paisnan rond di dje. Tambe tin cu destaca cu e poblacion tin acceso pa awa potabel na cas, cu ta permiti pa cumpli di un manera mas eficaz cu e medidanan di higiena.
