E comandante hefe di Ehercito nobo di Uruguay, Claudio Feola, kende a asumi dialuna pasa e cargo, a bisa prensa cu ‘no ta den condicion’ di afirma si ta berdad e denuncianan di violacion di derechonan humano durante e dictadura civico-militar (1973-1985).
E palabranan di Feola a surgi despues di e pedido di e organisacion di Mamanan y Famianan di persona Detenido Desapareci, kende a solicita e comandante nobo rechasa e echonan cu a sucede durante e golpi di estado.
“E contesta ey a consolida tur un cantidad di epoca den e cual a mi no ta den condicion, pa motibo cu a mi no sa si ta real of no ta real. Akinan tin hende hopi antiguo cu capas cu hasta mester haci un test psicologico pa motibo di tabata cu hopi presion, nos no sa si nan ta den nan consenshi real”, Feola a sigura.
Den e sentido aki, e comandante hefe a bisa cu no lo rechasa e suceso pa motibo cu no sa si ta confirma. Consulta di loke por ta confirma, si desaparicion of tortura, el a nenga di contesta.
Despues, Feola a keda obliga di emiti un comunicado den e cual el a aclara cu no a pretende ‘desconoce e existencia di persona desapareci’ y a agrega cu ehercito ‘lo continua haci esfuerso maximo pa duna un contesta na e reclamo di famianan’.
Feola ta di tres comandante hefe den menos di un luna, ya cu na comienso di maart a ser aparta di su cargo Guido Manini Ríos pa cuestionamento pa Husticia Uruguayo, y dia 1 di april José González a ser destitui despues di e filtracion di confesion di delito di e ex-militar José Gavazzo, cu durante e dictadura a ser omiti pa e autoridadnan.
