E empresa Mericano Schuepnach Energy a informa cu nan a habri un perforacion exploratorio na departamento di Paysandú (oeste) , y cu ta considera un sistema petrolero positivo, locual ta converti Uruguay den un pais cu un hayazgo unico riba su teritorio.

E pos exploratorio a haya e nomber di Cerro Padilla X-1, y a recupera ‘un cantidad modesto di petroleo na superficie,” despues di un perforacion realisa na un profundidad entre 794 y 796 meter, asina e empresa petrolero estatal Ancap a splica den un comunicado hunto cu ministerio di industria, energia y mineria (MIEM) y e empresa Mericano

Asina autoridad a comproba existencia di e prome sistema petrolero activo na Uruguay”.

Asina mes e gobierno di Uruguay a bisa cu e pos onshore mester pasa pa otro estudio tocante e “cantidad di hidrocarburo cu ta presente na superficie”

“Tin un capa di baranca generador, tin un trampa y complementando e trampa ey, tin un seyo cu ta forma un dak, y asina e hidrocarburo a keda conteni den e reserva aki pa miyones di aña, ” e comunicado a informa.

Institucionnan a bisa cu “ta considera un exito di por a corobora e existencia di e sistema petrolero aki, pa prome biaha na Uruguay.”

Shuepbach Energy Uruguay  a bisa cu na aña 2012 nan a firma un contract cu e empresa petrolero Ancap, cu lo permiti exploracion di hidrocarburo na 4 pos cu Uruguay tin te awor.