Cientificonan Uruguayo a logra desaroya y produci 50.000 prueba serologico di Covid-19. Esakinan lo permiti detecta si e pashentnan contagia a desaroya anticuerpo contra coronavirus, y di e manera aki, cua ta e alcance real di e enfermedad.
Esaki ta producto di un esfuerso colectivo entre Universidad di Republica di Uruguay (Udelar), Instituto Pasteur (IP), financiacion di Agencia Nacional di Investigacion y Innovacion (ANII) y Ministerio di Salud Publico y produccion di e empresa ATGen.
“Un biaha mas, e Academia Uruguayo, comunidad universitario, ta pone na disposicion di e pais un herment pa enfrenta e crisis sanitario”, e rector di Udelar, Rodrigo Arin a bisa den un conferencia di prensa.
Den e sentido aki, a señala cu e desaroyo no ta trata di “un casualidad” ni tabata espontaneo, sino cu ta coresponde pa acuerdonan institucional y decisionnan cu a wordo tuma durante añanan caba pa apoya e desaroyo di e ciencia “cu calidad internacional”.
E desaroyo a conta cu apoyo economico di ANII – casi 8 miyon peso Uruguayo, ekivalente na casi 190.000 dollar – y tambe lo tin di Fondo di Convergencia di Mercosur (Focem) pa garantisa su produccion masal. Arim a resalta cu tin un costo “cu no ta explicito”, cu tin di haci cu e trabou di investigadonan universitario.
Tin 50.000 prueba cu ya por cuminsa utilisa. Segun autoridadnan a splica un di foco lo ta poni den personal sanitario, considerando cu e sector ey ta esun cu ta mas exponi pa e virus.
Minister di Salud Publico, Daniel Salinas, a enfatisa cu e prueba aki “ta hopi solido” y cu un 97% di specificidad loke ta demostra su “confiabilidad halto”.
Gualberto Fernández, investigado di Facultad di Kimica, a splica cu e pruebanan aki ta yuda pa tin un nocion mas real di loke ta trata e presencia di Covid-19 na e pais, detectando e casonan asintomatico riba cual e prueba di PCR no a actua. “Test serologico lo bay ta hopi importante na momento cu aparece e vacuna, pa monitor con ta afecta e poblacion”, el a sigura.
