Minister di Interior Uruguayo, Eduardo Bonomi, acompaña pa e director nacional di Polis, Mario Layera, a anuncia den un conferencia di prensa e cifranan di delitonan cu a ser cometi durante aña 2018.
Na Uruguay e aña pasa tabatin un aumento record di homicidio y di hortamento violento den comparacion cu aña 2017. E asesinatonan a pasa di 284 pa 414, loke a implica un aumento di e 45,8% mientras cu e denuncianan pa hortamento violento a subi di 19.441 pa 29.904, aumento di 53,8%.
E hortamento a pasa di 115.549 na 2017 pa 145.161 na 2018, subida di 25,8%.
Cu e crecemento di asesinatonan, e cifra di homicidio pa cada100.000 habitante a yega te 11,8%.
E datonan ta supone un golpi pa e oficialismo den aña electoral, y un señal cu e gobierno di Tabaré Vázquez lo laga su di dos gobierno sin cumpli cu e promesa principal di su anterior campaña: reduci e hortamento pa 30% na 10 aña.
Den e prome añanan di e gobierno actual, polis a logra detene e aumento di criminalidad. Na 2016, e ministerio a anuncia un caida di e delitonan violento y a atribui esey na su strategianan policial.
E autoridadnan di Poder Hudicial, Polis y Fiscalia General ta debati desde varios siman pasa cua ta e real responsabilidad cu ta cay pa e Codigo nobo di Proceso Penal, pa e cual nan a haci varios cambio e aña pasa, y ki otro reforma mester aplica pa mehora esey.
Na e final di e conferencia di prensa, hefe di e polis a nombra algun medida cu a ser adopta den ultimo lunanan pa ‘contene di algun manera y descende e tendencia di violencia criminal’.
