Despues di e experiencia cu e Landsverordening Openbaarheid van Bestuur (LOB) cu Bon Dia a relata ultimo, unda minister di Husticia a ignora un peticion di LOB pa 18 luna, a busca otro experiencianan cu gobierno su aplicacion di e ley aki. Den cuadro di esaki, Bon Dia a combersa cu Ursell Arends di partido RAIZ, kende a entrega varios peticion di LOB desde cu e partido a cuminsa den 2017.

Durante RAIZ su trayecto, Arends a splica cu a yega di entrega varios LOB-verzoek. Entre nan tin 6: tocante Isla di Oro (mei 2018), conseho di DNM y DIP tocante Isla di Oro (juli 2018), boormento di West Capelle den Bon Bini (juli 2018), screening di inversionistanan na Baby Beach Hotel (april 2019), investigacion forensico ‘Tereno Gate’ (mei 2019) y finalmente proyectonan di hotel y condominium nobo (juli 2020).

Arends a comenta cu ‘mi mester menciona cu no ta tur minister ta cumpli cu ley y tuma un LOB-verzoek na serio’. Den e combersacion cu a tene cu Arends, a enfoca primordialmente riba e peticion entrega cerca ex minister di Infrastructura y Medio Ambiente Otmar Oduber, referente Isla di Oro.

E peticionnan aki ta un derecho cu tur ciudadano tin, Arends ta splica, obligando gobierno pa facilita informacion encuanto maneho y e ehecucion di maneho, si un ciudadano haci un peticion pa haya esaki. Por medio di un peticion di LOB, un ciudadano por pidi inspeccion of posecion di documentonan manera: permisonan, conseho referente un decision, un cambio di destinacion di erfpacht, rapportnan publico cu ta bou un ministerio of departamento, entre otro.

‘Nos prome LOB tabatin su efecto’
“Nos ta sinti cu e prome LOB-verzoek cu ta trata Isla di Oro, tabatin su efecto”, Arends a comenta.
E meta di e LOB-verzoek tabata, manera Arends ta splica, tabata pa haya sa den ki proceso di conseho e peticion di e inversionistanan tabata. “Un proyecto asina mester cana e caminda regular via e departamentonan di gobierno – conforme locual ley ta prescribi. Un ministro no ta dicidi riba su mes. E mester pidi conseho for di departamentonan concerni.”

Riba e pregunta si Arends a haya contesta na tempo pa su LOB-verzoek, Arends a splica cu e tempo ey a haya un contesta di inmediato, mirando cu a pone presion via prensa pa contesta e peticion. “Minister Otmar Oduber e tempo ey a confirma di ricibi e LOB-verzoek e mesun dia y a invita RAIZ pa un reunion riba diamars 8 di mei”.

Maske Arends ta menciona cu e ta considera cu e LOB-verzoek tabata exitoso, e tempo ey RAIZ a tene un conferencia di prensa riba Bubali Wetlands unda a splica cu no a haya ningun documento cu tabata pidiendo, mas bien a haya otro informacion comercial cu no a contesta e LOB-verzoek concretamente. “Den otro palabra, e USB cu nos a haya tabata un ‘kat in de zak’”.

A base di e siguiente peticion, finalmente minister a entrega consehonan di DNM y DIP tocante proyecto di Isla di Oro Zoetry. Dia 14 di juni 2018 minister a declara publicamente cu e consehonan di DNM y DIP a confirma e importancia pa proteha e area en cuestion. “Banda di e informacion cu RAIZ a pidi den e LOB-verzoek, minister tambe a entrega copia di e carta den cual minister ta informa e desaroyado cu, a base di e consehonan di DNM y DIP, su peticion encuanto e proyecto Zoetry no ta wordo honra.”

‘Tur minister semper mester ta dispuesto pa informa su pueblo’

Arends a comenta cu di e manera aki RAIZ den nomber di pueblo di Aruba ‘a logra di haya un contesta y alabes nos a zorg pa nos areanan di naturalesa protehi, wordo respeta tambe’.

Na mes momento Arends ta reconoce cu no tur peticion di LOB ta wordo honra, pero “RAIZ ta sigui boga pa bon gobernacion. RAIZ ta di opinion cu tur minister semper mester ta dispuesto pa informa su pueblo debidamente, mester kier comparti informacion den un forma transparente”.

Den un proximo edicion lo amplia mas riba RAIZ y otro organisacionnan nan LOB-verzoek.