Ursell Arends, lider di partido Raiz, a comparti nan mensahe na parlamento pa locual ta trata e Sugar Tax. Tambe el a splica cu mester cambia e manera di politica anticua, sin tuma medida cu por perhudica pueblo.
Arends a bisa cu AHATA a produci un lista di e medidanan halto. E ta bisa cu si sigui bay den direccion asina, ‘lo bay mata nos turismo’. Lo mata e sector priva y mata e unico pilar economico cu Aruba tin, ‘nos mester realisa esey’.
Sinembargo, Arends ta bisa cu si e Sugar Tax tabata pa salud manera ta wordo bisa, ta na su luga pa minister di salud trece esaki dilanti y no e minister di finanzas. “Ta bisa cu nos Arubiano ta gordo, pero ta aparato gubernamental mester baha gasto di gobierno.”
Arends ta bisa cu for di aña 1986, e banco gubernamental a trece mas hende sin tene cuenta cu henter comunidad tin cu paga p’e. E ta expresa cu parlamento mester tene gobierno sincero, unda cu minister di salud mester trece e punto dilanti y splica con lo uza e fondo di e Sugar Tax den beneficio di salud di nos pueblo.
Segun Arends, ta conoci cu comerciantenan y stakeholders a comparti nan mal contento, pero ainda no tin diseño cu a yega parlamento pa debati e tema den detaye. “Nos ta tumando nota pa discuti e area aki cu pueblo. Nos lo sigui vocifera nos preocupacion y di pueblo. Parlamento no por aproba un ley te ora cu sa na unda e fondo ta bay aloca. Nan por ehecuta nan tarea, pero nos ta exigi cu mester duna cuenta; ta spera di parlamento pa haci nan trabou debidamente.”
Arends a expresa cu nan lo keda activo pa representa pueblo ‘dignamente den parlamento y gobierno’. Cu nan movecion lo bin miho prepara pa siguiente eleccion y cu nan lo keda activo pa crowdfunding.
Finalmente, Arends ta conclui cu tin cu cambia e manera di politica anticua pa uno moderno. Pa politiconan stop di critica otro y pa bin cu solucion y alternativa pa un problema, sin tuma medida cu ta perhudica pueblo y comercio.
