Nos isla no ta tene suficiente cuenta cu personanan cu limitacion como consecuencia cu mas y mas ciudadano ta biba isola y no por participa mas den comunidad. Un problema creciendo como cu e porcentahe hende riba edad halto ta aumentando fuerte.
Asina tin mas urgencia pa Aruba adapta su espacio publico, transportacion publico, instancianan di cuido y hopi otro caminda pa facilita e grupo di persona creciendo cu limitacion fisico.
Esaki ta e mensahe clave duna durante un charla na universidad recientemente riba ‘accesibilidad den un Aruba envelhecendo’. E presentacion aki tabata den man di docente na Universidad di Aruba, Mieke Droog, kende a invita Marij van den Wildenberg di Bartiméus, un organisacion cu ta facilita hende cu problema di bista. Sra. Van den Wildenberg a traha conhuntamente cu otronan riba un buki extenso yama Architectuur door andere ogen (arkitectura den wowo diferente) cua tin hopi informacion valioso pa arkitectonan pero tambe gobierno y otro cu ta encarga cu espacio publico (caminda, plaza) sea (laga) traha edificio. E informacion ta encera reglanan, normanan, pero tambe tipnan practico con por ehempel diseña espacio cu ta yuda hende cu diferente limitacion pa orienta nan mes miho, evita cu nan ta perde, cay of no por uza mes.
E charla a tuma luga den aula di Universidad di Aruba y ya por mira cu e trapi ta haci’e dificil pa personanan cu problema di cana pa drenta e luga. E biaha aki nan a pone un rampa, pero normalmente cu eventonan den e aula, no ta mira esaki. Durante e presentacion di sra. Van den Wildenberg, el a bay den detaye cu no ta asina comun manera con luz di pafo ta drenta un espacio. E ta mustra cu hasta pa personanan cu por wak bon, esaki por bira un obstaculo. “E trend ta pa arkitecto traha edificio moderno uzando hopi glas. Pero pa personanan cu limitacion pa motibo di luz y falta di contrast esaki por crea asina problema cu e luga ta bira no accesibel.” E ta duna un ehempel di un trapi halto traha completamente di glas den un oficina nobo di Apple na Amsterdam. Comentarionan for di e publico di sala a mustra cu hasta hende cu no tin problema di wowo ta indica cu un trapi asina nan tin miedo di cay.
Molester di zonido
Un otro punto no mucho conoci ta zonido. Algo cu na Aruba hopi hende di edad ta kehando di dje, tambe pasobra hopi caminda (tienda, restaurant, etc.) ta toca musica y tambe duro. Atrobe ta kehonan di hende cu no tur ora tin problema grave cu oido sinembargo pa motibo di e zonido den background, pero tambe pa motibo con e espacio ta traha, tin dificultad pa tene un combersacion. Sra. Van den Wildenberg ta splicando cu nan ta midi ‘nagalmtijd’ den espacionan. Pues con e zonido ta resona bek. Esaki mester ta entre 0,4 y 0,6 pa asina hende por tende otro. Den e caso nan ta midi mas halto, bo por pone cierto obhetonan cu ta absorba zonido y asina mehora e accesibilidad pa hende cu tin problema cu oido.
