E rapport di DCNA ta destaca cierto actividad humano cu ta contribuyendo na e destruccion di e ecosistemanan local. Sinembargo, algun di esakinan ya a keda denuncia pa gruponan ambientalista den pasado, sin cu ta mira mucho accion di autoridadnan pa trece conscientisacion y un cambio.

Rock stacking

Rock stacking ta un problema cu cada rato ta keda bin dilanti entre nos comunidad local. Esaki ta ora hende, principalmente turista, ta traha un toren di piedra na cierto areanan di e isla. Maske e actividad di pone piedra riba otro ta uno ancestral, cu cientificonan speculando cu tabata haci esaki pa marca sitionan importante manera santana, of tambe pa marca rutanan pa cana den selva sin perde, e actividad aki a bira popular den ultimo decadanan entre turistanan cu ta crea un rock stack pa pidi un deseo.

Fin di juni ultimo, Aruba Birdlife Conservation a bati alarma pa e fenomeno di “rock stacking” cu a yega e area di Baby Beach, y alabes a adverti tocante e peliger cu esaki por tin, specialmente pa mucha.

Efecto di rock stacking riba naturalesa ta perhudicial, ya cu e piedranan ta forma parti di habitat natural di especienan di bestianan chikito cu ta biba den naturalesa di Aruba. Algun experto ta bisa cu “rock stacking” por hasta hiba cierto especie pa extincion.

Na Aruba, hopi di e “rock stacking” ta pasa tambe cerca di Parke Nacional Arikok. Aunke e practica di e actividad aki no ta ilegal na Aruba, talbes ta tempo pa autoridadnan di parke pone reglanan estricto pa cu e actividad aki.

E publicacion di Aruba Birdlife Conservation no solamente ta bati alarma pa e actividad, pero aworaki cu e fenomeno aki a yega Baby Beach, algun di e torennan di piedra ta yega 1.7 meter di haltura, cual por ta hopi peligroso, specialmente pa muchanan.

Urbanisacion
 Otro di e retonan mas grandi cu naturalesa di Aruba ta enfrenta ta urbanisacion, den e forma di “sobre-desaroyo.” Esaki ta vincula tambe na e industria turistico di Aruba, y igualmente a ricibi atencion di ambientalistanan den pasado. Urbanisacion ta nifica cu ta construi y crea ambientenan artificial humano riba areanan cu antes tabata natural. Esaki ta necesario pa economia y industria, pero por ta fatal pa un ecosistema fragil manera esun di Aruba.

Protestanan social manera esun di activista Nigel Maduro, kende a bira famoso cu e slogan “No More Hotels,” ta destaca e necesidad pa stop construccion desproporcional cu no ta laga espacio pa naturalesa por sobrevivi.