Dia 24 di augustus proximo fundacion Dominicana Arubaanse Juan Pablo Duarte ta organisa su debate politico bou e nomber Democracia Aruba 2017. E ta enfoca mas tanto riba topiconan di interes pa e comunidad Latino y di otro nacionalidad residencia na Aruba. Esaki den cuadro di e proximo eleccion.

Presidente di e fundacion, Winston Tavarez ta bisa Bon Dia Aruba cu den e debate aki nan ta practicamente representando e bos Latino y Caribense tambe. El a laga sa cu e tipo di debate aki ta contribui pa e pueblo votado tin mas informacion; y asina nan por deposita nan voto mas consciente. “Bo lo tin un bista mas of menos pa kende bo lo bay vota. Kico ta e proyectonan cu nan tin pa e comunidad Latino”.

Inkietud comunidad Latino y Caribense
E preguntanan lo tin di haber cu e inkietud y preocupacion di e comunidad Latino y Caribense riba tereno laboral, permiso y problema cu persona indocumenta, integracion, union familiar, onderstand, etc.. Tur partido lo haya e preguntanan otro siman, prome cu e evento lo tuma luga pa asina cada lider por ta bon prepara.

Te aworaki tur cos ta bayendo bon cu e organisacion di e debate cu lo conta cu Wilmer Arristizabal como su moderador. Te aworaki tur partido a confirma nan participacion. Pero finalmente ta depende cu e partidonan pendiente ainda pa colecta e total di firma exigi pa e Conseho Electoral por cumpli na tempo cu e exigencia aki. Ainda ta pendiente tres partido, MAS, ABO y Curpa. Den e caso di e aliansa ultimo entre UPP y PPA, el a bisa cu independientemente cu nan a cera cabes, e lidernan original di e partidonan, sr. Wever y sr. Nisbet ta participa tambe.

Encuanto e supuesto abstencion di e partido AVP den e debate aki, el a laga sa cu tabata trata di un mal comunicacion; pero tur cos a wordo soluciona. E partido berde a confirma su participacion mescos cu e otro partidonan cu ta aspira di participa den eleccion di dia 22 di september awor. El a splica cu e impasse cu a presenta tabata cu varios partido a confirma nan participacion un tiki laat di e fecha stipula. Pero e organisadonan di e debate finalmente a dicidi pa laga nan participa pa e bien di democracia participativo.

Den e debate lo participa e lidernan di cada partido. Pero den caso cu algun di nan no por ta presente ya cu nan no ta na Aruba, e organisadonan lo evalua si nan por haci un excepcion, ya cu principalmente e ta un debate entre e lidernan di cada partido.

Organisacion
Esaki ta e prome biaha cu e fundacion Dominicana Arubansee Juan Pablo Duarte ta organisa e debate aki; aunke esaki ta e di tres debate cu a wordo organisa pa e comunidad Latino. E delaster a tuma luga na aña 2013 bou otro nomber: Encuentro Latino Americano. Esaki a tuma luga na Renaissance Conference Center y el a wordo organisa pa miembronan di otro fundacion, esta Asociacion Amigos de Colombia (Asocol).

“Nos a dicidi e biaha aki di organis’e ariba nos mes. Pero nos tin e porta habri pa tur otro agrupacion cu kier join nos pa e debate aki”, sr. Tavarez ta bisa. E ta aclaria cu Win Donata di Radio Latina ta esun cu a acerca e fundacion pa organisa e debate aki. Mientras cu e miembronan di e directiva actual di Asocol a confirma nan presencia y otro organisacionnan lo t’ey tambe.

Tur debate tin su reglanan y nan tambe tin nan propio regla pa e bon marcha y resultado di e evento aki. Un regla basico ta cu tur hende mester comporta nan mes bon. Tambe lo bin trahadonan di siguridad pa mantene e bon ambiente di e debate. Tampoco lo no permiti consumo di bebida alcoholico ni gritamento of propaganda politico. Tin otro reglanan cu nan ta discutiendo internamente ainda.

Ticket ta costa 25 florin pa publico por asisti na e debate aki. Esun interesa por yama na tel 582- 5890. Ademas cada partido a ricibi un cantidad di entrada pa asina sostene financieramente e evento aki; ya cu e tin gastonan envolvi. Te aworaki e debate lo wordo transmiti via emisoranan so.