UPP – Un partido cu ta para pa bon gobernacion

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta.  Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto.  Awe nos ta continua cu partido Union Patriotico Progresista (UPP).

UPP – Un partido cu ta para pa bon gobernacion
Candelario Ambrosio (Booshi) Wever ta conta nos cu na aña 2012 despues cu su persona a milita pa hopi aña den otro organisacion politico, a bini hunto cu algun hende anto dicidi pa lanta un partido nobo.  Wever: “No solamente un partido nobo, pero un partido diferente. Un partido na unda cu ningun hende,famia if forsa financiero ta doño.” Un di nan puntonan principal ta integracion di tur hende cu ta biba na Aruba, sea cualkier rasa of religion. Segun sr. Wever, seguramente un punto cu nan ta para pe tambe ta pa bon gobernacion, educacion, seguridad anto integracion. “Bon gobernacion ta mas cu algun regla.  Bon gobernacion ta na unda cu casonan cu recientemente a pasa cu un minister ta pa pasado y na unda cu no lo tin mucho discusion mas riba cosnan cu por a bay malo. Masha tiki lo tin ora bo tin tur bo check & balances regla.” Wever ta sigui bisa cu nos no mester mira mucho leu por ehempel un pais manera Hulanda cu tin bon gobernacion den su luga. Na unda cu si bo gusta of no, e comunidad Hulandes ta contento con esaki ta.

Reglanan estricto pa goberna
Wever ta splica: “Si bo mira na otro paisnan por ehempel unda tin reglanan estricto di bon gobernacion. Resultadonan di encuestanan por ehempel cu Amnesty International ta haci den e paisnan aki ta mustra entre otro 98% cu no tin corupcion. Di otro banda un organo di nacionnan uni recientemente a haci un encuesta di e nivel di con contento un hende por ta, sin paga hende manera cu a sosode na Aruba. A resulta cu Norwegen, Denmark, Finland y Hulanda ta sumamente contento cu e gobernacion y esaki nos kier pa e pueblo. Na unda cu tin reglanan estricto con pa goberna pero tambe pa ciudadanonan. Alabes bo ta mira cu e prioridadnan ta poni corectamente y bienestar ta bin bek pa e pueblo.”
Sr. Wever ta bisa cu UPP como un partido social democrata, ta un partido cu ta para pa e ser humano pero tambe pa e ser humano aki tin un gobierno drechi.
“Naturalmente un gobierno cu tin hende integro pero tambe un gobernacion caminda tin leynan cu ta percura pa tur hende keda integro cual ta hopi importante,” sr. Wever ta bisa.

Abuso di poder
UPP ta consisti di 15 candidato y sr. Wever ta enfatisa cu UPP no kier cantidad sino calidad; hendenan cu ta kere den nan programa. “Mi ta kere cu pueblo ta cansa di engaño, populismo, primiti cos cu no por cumpli, pero nos no. Unico cos cu nos ta primiti e pueblo aki, sagradamente anto ta compromete nos mes pa esaki, cu nos ta bay mara e man di politico. E politico no por haci abuso mas di su poder, locual ta sosode den e gobierno aki.”

Politica di patronahe
Sr. Wever ta enfatisa cu e momento a yega pa e pueblo realisa cu politica di patronahe no ta trece resultadonan y na final di dia cu ta pueblo mes ta paga pe.
E ta splica: “Ora cu bo grita pa bay baha pensioen sin sa kico e situacion financiero real ta. Hende ta grita aña aden y aña afo pa bin cu ley pa financiamento di partidonan politico, pero ni gobierno of parlamentarionan ta bin cu iniciativa pa haci esaki. Yen papiamento, pero realmente nada ta pasa.” E ta sigui bisa nos cu den su trayectoria como politico e ta un di esunnan cu a wordo demonisa tambe pero e ta clasifica su mes como un ‘no nonsense politician’.

“Ami no tin dos agenda of dos cara, locual mi ta papia cubo ta locual ta bay dilanti. Nos a pone nos dilanti por ehempel pa paga e candela na dump cual nos a haci den cinco luna. Nos a bin cu un solucion duradero pe, pero lastimamente, pa motibonan partidista, infantil y pa faborece companianan local, nan a boycott e.” E ta sigui bisa: “Ora cu tur hende tabata papia cu Aruba no tin luga pa un segundo hospital, nos a haci nos estudio y bin cu un hospital full flex na San Nicolas. E gobierno aki a scoge pa boycott e proyecto aki. ” Pa conclui, sr Wever ta bisa cu nan ta bay forma un bloke pa tur partido politico kinan. Splicando cu: ” Si ken cu ta cu kier traha cu UPP den un siguiente gobernacion, mester compromete nan mes cu nos cu e compromiso nacional cu tur partido politico tin na Aruba for di dos pa tres aña pasa caba, esey ta locual nos ta para pe.”

Video di entrevista cu sr. Booshi Wever