Awor cu e acuerdonan cu Valero y Citgo (Aruba) ta un hecho, gobierno por canta gloria cu e hazaña aki. Ya cu oposicion tambe ta mira reapertura di e refineria, miho dicho e upgrader, como e salbacion pa ‘kickstart’ Aruba su economia a corto plaso, tur hende por ta contento. Ta cera aña 2016 cu extra placa den caha, y ta habri 2017 cu miho perspectiva, cu e actividadnan di rehabilitacion treciendo extra entrada pa gobierno aden. Anto, ‘all ‘s well that ends well?” Por ta cu si, por ta cu no.
E proyecto petrolero nobo, pasobra esey e ta, no ta tuma luga den bashi, sino den contexto di e industria di cual e ta forma parti. Tin tres aspecto importante aki: e situacion financiero/operacional di PDVSA y su sucursalnan, e situacion economico y politico general na Venezuela, y e situacion riba mercado mundial di petroleo. Pa cuminsa cu e contexto di e empresa madre y su subsidiarionan, por bisa cu a keda cierto pregunta sin contesta ainda. Un punto cu segun nos opinion a keda habri ta e forma di financia e proyecto. Mientras gobierno ta keda menciona e compania Mericano Citgo Petroleum Corporation como nan partner den e deal aki, e compania mes a emiti, un dia despues di e acuerdo firma dia 10 di juni 2016 na Caracas, un comunicado di prensa cu nan ta solamente participa cu asistencia tecnico den e proyecto di rehabilitacion. Cu enfasis nan a bisa tambe cu financiamento pa e proyecto lo mester keda regla externamente. Y ken mester regla esaki? Citgo Aruba Holding LLC, su subsidiario Citgo Aruba Refinery NV, of PDV Holding, of PDVSA mes.
Ta conoci sin embargo cu PDVSA, y su holdingnan subsidiario, ta den problema financiero serio, anticipando hasta un posibel collapse financiero di PDVSA. Kico ta causa e situacion aki? En corto, e hecho cu estado Venezolano a chica e compania di tal manera cu nan no a keda cu recurso pa financia nan mes pa loke ta mantenemento, ni inversion nobo. Cu consecuencia cu produccion a mengua, poniendo mas presion ainda riba e compania. Ironicamente ta e collapse di e demanda interno pa producto petrolero a haci cu te awor PDVSA por a mantene e mesun nivel di exportacion. Di otro banda, cu un dependencia di 94% di nan exportacion riba petroleo, e caida di prijs mundial di crudo a dal e compania y e pais hopi duro. Falta di mantenemento, producto di atraso gigantesco den pago di proveedornan (internacional) di servicio ta limitando produccion. Riba tur esey, e problemanan reciente cu suministro di electricidad a caba di daña e perspectivanan pa mehora produccion. Tambe problemanan tecnico na e waf principal Jose, pa exportacion di crudo y pa importacion di nafta y crudo liviano, a haci cu actualmente produccion di crudo ta na apenas 2 miyon bari pa dia, mientras cu aña pasa ainda esaki tabata na 300.000 bari pa dia mas halto.
Kico nos kier señala aki ta cu Venezuela y PDVSA nan problema no ta na 2018, ora cu si tur cos bay bon, nan por habri e facilidad na Aruba pa mehora crudo. Nan problema ta awor pa mantene cabes riba awa, buscando refinanciamento di debe di PDVSA, cu ta cerca di 20 biyon dollar, cu varios biyon pa refinancia e aña aki ainda.
Banda di esaki e situacion politico y social na Venezuela ta asina explosivo, cu por haci e pregunta kico ta bin prome, collapse di PDVSA o di e pais mes. Riba tur esaki, mercado mundial di crudo no ta mustra mehoracion di prijs por lo pronto, cu consecuencia cu e ganashi riba petroleo, kitando un costo promedio di $27,50 pa bari di crudo Venezolano, ta keda minimo. Prijs di crudo Venezolano ta bende na un prijs 8 -9 dollar bao di e benchmark internacional West Texas Intermediate (WTI), cu awe ta na casi $45 pa bari.
Lo ta interesante pa sa anto di unda e financiamento finalmente ta bin. E rumornan cu ta Roberto Rincón, e magnate ‘selfmade’ via robo na gran escala na PDVSA, lo a financia e rehabilitacion, a keda na rumor, ya cu e ta pa basta aña den prizon na Merca. Straño cu e compania PDVSA, cu a perde practicamente mil miyon dollar cu e patrañanan di e persona aki, te awe no a denuncia ningun di e casonan di descapitalisacion di e empresa.
Tur e sucedidonan aki mester sirbi si como advertencia pa autoridadnan local, pa no duna oportunidad na otro tipo manera Rincón pa hinca placa sushi den economia di Aruba. Ta conoci cu Banco Central di Aruba den pasado reciente a sa di haci su trabao debidamente, impediendo cu placa di origen dudoso a drenta Aruba pa inverti den un compania stranhero. E hecho cu gobierno di Aruba, indirectamente nos tur, ta hinca den e deal aki, no mester ta motibo pa ‘look the other way’. Es mas, esey ta motibo pa controla extra bon ken y con ta bay trece placa Aruba pa e proyecto aki. P’esey ta importante pa parlamento haya tur documento, no e leynan so.
