Trahadonan Valero na mesa bek y MEP a haya contractnan
E mas cu 50 trahadonan di Valero ta sinta bek na mesa cu Valero, Citgo cu gobierno. Esaki ta e resultado ayera unda e situacion a trankilisa y tabatin intencion pa tene accion. Den e polemica di documento, como cu gobierno no ta duna tur aunke parlamento a pidi varios biaha, MEP a duna di conoce awe cu nan a logra di pone man riba e contractonan.
Esaki lider Evelyn Wever Croes a bisa den un transmision live riba Facebook. E ta mustra tambe cu den e contracto cu Valero, e compania aki a duna permiso na diferente instancianan manera parlamento pa nan por haya nan. Pues gobierno no tin motibo pa nenga parlamento e contractonan, segun sra. Croes.
Ayera lider di PDR, Andin Bikker tambe a indica cu ministernan por ta castigabel si nan ta nenga di duna copia na parlamento di documentonan cu ta importante. Hasta nan por bay 3 aña den prizon y e ta investigando awor si den e caso di e refineria, e por uza esaki contra gobierno.
Pues e unico fraccion den parlamento cu ta bisa cu nan tin e documentonan cu gobierno ta considera confidencial, ta MEP. Sra. Croes ta bisa cu nan ta bay studia nan mas profundo pero ya caba e ta vocifera su preocupacionnan. “Nos no ta haya un refineria pero un upgrader.” Segun esey ta hopi mas limita y ta nifica cu lo produci productonan cu ta laga hopi mas sushi atras. “Manera e preto cu antes nan a laga atras na Grapefield.”
E tambe ta menciona e 300 miyon dollar di garantia di gobierno como un riesgo financiero grandi. Locual Bon Dia Aruba tambe a trece den su edicion di diabierna unda tambe a publica diferente paginanan di e conseho di Raad van Advies riba e riesgonanan cu e organo di consulta tambe a critica.
Nos a publica e e ley di Citgo completo cu conseho di Raad van Advies y otro documentonan riba nos website www.bondia24.com.
Medio ambiente
E lider di MEP tambe ta menciona cu e ta preocupa cu e medio ambiente pasobra den e contracto cu Citgo no tin nada palabra. “Nan not ta tene e compania na nada.”
E tambe ta cuestiona cu gobierno lo haya e negoshi di distribuido y benta di combustibel (entre otro gasolin) local. “Esey ta algo bon pero gobierno lo kier bende e accionnan pa un tercer parti. Y nos tur sa ken ta esun cerca di gobierno cu lo haya tur e deal.”
Sinembargo na final e lider di e partido oposicion ta duna indicacion cu ainda e partido ta pro e proyecto. “Tin e preocupacionnan. Pero ora bo ta pone tur cos den balansa, na fin di dia su reapertura ta genera mas na e economia, e ta trece bida na San Nicolas y mas empleo. Nos lo tuma un decision pa e bienestar di Aruba, na e bienestar di e 700 tata y mama cu ta haya trabou.” Pero prome cos cu ta bay fout MEP lo para ta e ministernan Mike Eman y Mike De Meza y tambe Richard Arends ( e cabes di e team di negociado, di parti di Pais Aruba) ‘personalmente responsabel”, sra. Croes ta bisa.
