Aña pasa Dutch Caribbean Nature Alliance (DCNA) a lansa oficialmente e proyecto ‘Monitoring for Bird Biodiversity Conservation in the Dutch Caribbean’. “ Monitoreo pa Conservacion di Biodiversidad di Parha den Caribe Hulandes”.

E iniciativa aki, sosteni pa Ministerio di Agricultura, Naturalesa y Calidad di Alimento (LNV), tin como meta ekipa e organisacionnan local di maneho di naturalesa na Aruba, Boneiro, Corsou, Saba, St. Eustatius y St. Maarten cu herment pa monitorea y proteha e poblacionnan di parha di tera y nan medio ambiente. Despues di un prome aña exitoso, tur e islanan ta preparando pa e coleccion di data di lente.

Mas cu djis un coleccion di data, e proyecto dinamico aki, conduci pa ciencia, ta facilita analisis y conocemento di tendencia di data di poblacion di parha, dunando un bista mas profundo di salud di medio ambiente di tur e seis islanan di Caribe Hulandes. E proyecto, cu ta programa pa e prome trimester di 2028, ta uza entrenamento mehora, programa di monitorio standarisa y encuesta di campo pa duna informacion valioso di salud di e ecosistema local. Pa medio di un evaluacion di abundancia relativo, composicion di especie y cambio den medio ambiente, e iniciativa ta ofrece un bista unico pa evalua salud general di e ecosistema. Ademas, pa motibo cu parha ta hunga un rol importante den ecosistema di e islanan, nan ta contribui na polinacion, plamamento di simia y ta enfatisa importancia di e areanan proteha pa e especienan vulnerabel.

Informacion di Aña Pasa

Mientras cu cada isla ta prepara pa colecta data di lente, ta esencial pa reflexiona tocante algun descubrimento interesante di e investigacionnan di aña pasa. Na Aruba y Boneiro a registra menos parha den herfst cu den lente, y e especienan tabata distribui mas uniformemente den e substrato di lava.

Na Corsou a observa mas especie den herfst, y e rikesa di especie/evenencia tabata un tiki mas halto den e sustrato di lava. Durante e investigacionnan di herfst na Aruba, nan a observa mas tanto Chuchubi tropical, Mofi, Totolica y Barica hel, mientras cu na Boneiro e parhanan mas comun tabata Prikichi, Tirano grandi, Chuchubi tropical y Trupial Venezolano. Na Corsou tabata Parha di misa, sigui pa Chonchorogay, Barica hel y Chuchubi Tropical cu nan a observa mas tanto. Den lente y herfst e abundancia relativo promedio di tur especie cu nan a observa tabata mas halto den calichi cu den substrato di lava na Aruba y Boneiro. Esaki tabata e caso tambe na Corsou den lente, pero no den herfst.

Mescos cu na Aruba y Boneiro, nan a registra mas tanto especie na St. Eustatius y Sint Maarten den lente, y ta especienan cu ta mas distribui den mondi seco. Ta posibel cu e especienan mas raro cu ta biba den e zonanan di transicion ta aglomera mas den mondi compara cu e especienan mas comun cu tin plama mas amplio. Na Saba, mas especie a wordo observa den selva seco y den selva tropical den herfst, pero menos den e zona di transicion (entre selva seco y selva tropical). Barica hel tabata un di e cuater especienan mas comun observa na tur e tres islanan, hunto cu Pearly-eyed Thrasher, Lesser Antillean Bullfinch y Palomba azul (na Saba); Zenaida Dove, Pearly-eyed Thrasher y Antillean Crested Hummingbird (na Statia); y Mofi, Lesser Antillean Bullfinch y Eleania Caribeño (na Sint Maarten).

Esfuerso di e seis islanan

DCNA ta desea di gradici tur isla pa nan esfuerso pa a haci e prome aña di copilacion di data un exito y Ministerio di LNV pa suministro di fondo. Cu tempo e tendencianan di populacion lo permiti e parkenan pa considera si ta necesario pa implementa (extra) strategia di conservacion pa e especienan raro of cu ta birando menos.

E proyecto aki cu ta dura cinco aña lo duna un bista crucial di e status di e poblacionnan di parha di tera cu ta broei na tur e seis islanan di Caribe Hulandes y lo duna e trahadonan di maneho instrumento pa por traha miho plan pa conservacion efectivo di e especienan local riba termino largo. Ta bay colecta e datonan di lente pa 2024 na tur e seis islanan entre luna di maart y april, pues keda pendiente di autoridad local di maneho di parke-Aruba National Parks Foundation (FPNA), STINAPA Bonaire, CARMABI Curaçao , Saba Conservation Foundation (SCF), Nature Foundation St. Maarten (NFSXM) y St. Eustatius National Parks (STENAPA).