Den pasado recien nos a skirbi varios columna amplio over e stapnan cu mi persona a tuma pa baha nos consumo mensual di coriente. Esaki ta un topico cu tin no solamente efecto riba e consumidor directo di coriente pero por tin su spill-overs sumamente positivo pa full nos sociedad. Den contexto aki e ta duna mi un placer sumamente grandi pa comparti mi data di uso mensual di coriente di e dos lunanan cu a pasa.

Manera nos por wak den e screenshot di nos factura cu Elmar e delaster dos luna cu a pasa nos consumo di coriente a baha den un manera visibel. Tambe cu e patronchi aki ta visibel dos luna sigui cu ta indica cu e no ta “uitschieter” pero un tendencia mas permanente. Compara cu 1 aña pasa prome cu a cuminsa inverti den haci nos hogar energie-zuinig nos consumo pa luna di Maart tabata 644 kWh, awo manera nos por observa el a baha te na 379 kWh, un reduccion di mas cu 42%!

Nos tin cu nota cu nos consumo di coriente nunca tabata dje halto, specialmente compara hopi hende cu ta paga 400 pa 500 florin na coriente pa luna. Den e caso aki, esaki segun mi persona lo forma un motivacion sumamente grandi pa haci un cas energie-zuinig. Manera a splica den columnanan den pasado por haci esaki stapgewijs y durante un aña of mas (si ta un cas hopi grandi), ta bay den direccion di haci un cas full energie-zuinig.

Overzicht di tur inversion haci te cu awo

Den e prome fase a laga cambia mi airco pa un nobo relativamente energie-zuinig y a verf nos dak blanco. Principalmente den e lunanan di calor extremo nos a wak cu nos consumo a baha directamente cu mas o menos 200 kWh, of si no 70 florin pa luna. E gastonan di esaki tabata 1.150 florin pa e airco incluso su instalacion y 400 florin pa verf e dak blanco dos man, incluso labor. Den e di dos fase nos a laga insula e camber cu fiberwool insulation y haci e plafond sheetrock, cu tabata un inversion di 1.200 incluyendo tur cos. Den e delaster y tercer fase nos a laga cambia nos frishider pa uno nobo energie-zuinig y a laga cambia tur luz pa esnan LED. Cual tambe a sali mas o menos 1.200 florin.

Dus den su totalidad a inverti 3.950,- florin dus afgerond 4.000,- florin. Den contexto aki e inversion aki te cu awo ta lever-op mas o menos 90,- florin den besparingen pa luna, cual ta 1.080,- florin pa aña den besparing. Nos haci un calculacion e Return-on-Investment di esaki ta 27% pa aña. Tambe nos tin cu bisa cu esaki ta e minimuum besparing, pasobra probablemente den lunanan binidero di calor e besparingen lo ta mas duidelijk y grandi ainda.

Spill-overs masivo pa sociedad

No ta solamente e consumidor ta spaar masivamente, pero riba plaso largo strategico nos lo baha nos consumo di Heavy Fuel Oil, cual lo tin efecto masha grandi pa nos saldo di Cuenta Coriente di pais Aruba. Mi kier invita nos kader politico imagina e impacto masivo y positivo cu lo tin pa henter Aruba y tur su habitante y negoshinan si por ehempel henter pais Aruba por baha su consumo di coriente cu 42%. E impacto aki pa henter nos sociedad lo ta uno sumamente bunita y hopi positivo riba casi tur parti di comunidad.

Financiamento pa Pueblo ta Necesario

Nos tin cu nota di biaha cu nos hogar tabata tin e capital disponibel pa haci e vision un realidad, pero esaki simplemente no ta posibel pa masha hopi famia, hasta si nan kier inverti pa haci nan cas energie-zuinig. Den contexto aki, bezig ta wak e besparing directo, e spill-overs pa sociedad riba plazo strategico. Siguramente esaki ta un tendencia cu Gobierno lo mester stimula mas hopi cu ta posibel. Den esaki subsidio y financiamento atractivo ta e hermentnan clave cu un Gobierno por usa.

Mi ta spera cu mi mesun experimentacion por forma un inspiracion pa tur esnan cu kier baha nan consumo di coriente y mas importante pa nos Gobierno nobo stimula e tendencia positivo aki pa full sociedad Arubiano mas hopi cu ta posibel.