ORANJESTAD -Recientemente minister Ruiz-Maduro a reuni cu directiva di Unoca, pa haya sa mas di nan plannan relaciona cu e sosten financiero cu nan ta brinda uzando fondonan publico.
Pa aña 2019, Unoca ta conta cu un suma di 900,000.= florin di Gobierno pa por funciona y subsidia proyectonan di persona of instancia cu ta acerca Unoca cu peticion pa sosten financiero.
Durante e reunion minister Ruiz-Maduro a enfatisa e importancia cu su persona kier duna na proyectonan cu tin como meta pa tene nos idioma Papiamento bibo. Nos idioma ta importante y ta uni nos como Pais. Pa e motibo aki proyectonan cu ta contribui na un miho uzo y na desaroyo di nos idioma mester por conta cu sosten financiero di Unoca.
Minister Ruiz-Maduro ta pidi atencion special pa proyectonan cu ta contribui na conserva herencia cultural inmaterial di nos pais. Nos musica tipico tambe ta forma parti di nos cultural intangible. P’esey ta importante y necesario pa nos haci mas esfuerso pa conserva e genero musical aki, pa e no bay perdi. Aki ta unda a mustra Unoca tambe riba e importancia cu por ehempel e documentario di Dande, cu ta den ehecucion, tin pa nos pais. Den e documentario aki, ya pa dos aña sigui a filma nos cantadonan di Dande riba dia di aña nobo, pa asina por documenta e tradicion cultural aki ‘en vivo’ y pa conserva historia, canto y e custumbernan relaciona cu e celebracion aki den temporada di fin di aña na Aruba.
E mandatario a pidi Unoca pa duna mas informacion na e sector di cultura entre otro pa reuni cu gruponan tipico y e centronan di bario, pa asina nan por sa kico ta e rekisitonan pa por ricibi yudansa financiero pa nan proyectonan. Esaki lo haci presentacionnan cultural mas accesibel pa pueblo en general. Cultura nos mester bib’e. P’esey minister Ruiz-Maduro ta trahando hunto cu Unoca y tur otro instancia cultural cu ta ricibi subsidio di gobierno por brinda e sosten financiero y e tarima necesario pa pueblo di Aruba por disfruta di locual ta forma parti di nos cultura.
