Universidad di Aruba (UA) a tene un conferencia di prensa pa duna di conoce dos actividad cu lo tuma luga otro siman den aspecto di Organization, Governance and Management (OGM).

Mieke de Droog decano di e facultad di Arte y Ciencia a informa cu dia 22 di Juni for di 10or di mainta te cu 12or di merdia lo tene OGM Research Conference cu tin e nomber ‘The impact of COVID-19: pathways to recovery’ un conferencia virtual cu segun el a menciona ta dirigi pa sostene organisacionnan na Aruba cu ta den proceso di recuperacion di Covid-19.

Door di pandemia diferente areanan y sector a wordo perhudica, den esaki tur organisacion cu a pasa e reto ey lo por uni na e evento aki, igualmente studiantenan actual di nan programa OGM, organisacion y docentenan cu tambe lo uni cu e meta di haci intercambio di kico e organisacionnan tin mester, via investigacionnan por yuda e organisacion yega na e idea y solucion pa nan retonan, segun loke de Droog a comenta.

“E ta hopi importante pa nos haya sa kico nan tin mester pa haci nan escogencia pa duna un miho servicio, un miho governance” el a indica.

Pa e motibo ey nan kier scucha e organisacionnan, kico nan kier haya sa, pa como studiantenan y docentenan di Universidad di Aruba por yuda nan, e dos profesor di nan programa Profesor dr. M. Noordegraaf y Profesor dr. W. Bakker tambe lo haci nan contribucion na e evento aki como experto den area di ‘governance’, ‘community and cohesion’, y ‘public services’ cual ta e tres temanan di e evento.

Di e forma aki por explora kico e retonan di cada organisacion ta y cual contribucion por haci na e organisacion y tambe na nan programa door di colabora entre nan studiantenan y e organisacionnan door di haci investigacion cientifico pa e organisacion, pasantia, tesis of proyecto.

Tambe, Nurianne Arias docente di Organization, Governance and Management (OGM) na Facultad di Arte y Ciencia na UA a trece dilanti cu dia 21 di juni nan tin un otro evento special, su prome ‘Career Event’ pa tur studiante di Aruba cu kier sa kico nan por studia of kico nan por haci si nan lo studia OGM, kico e profesionalnan ta haci ora nan ta caba e studio.

El a sigura cu nan tin diferente personanan cu a gradua y ta traha na sector priva of publico, nan tin un impacto grandi na Aruba y esey ta algo bunita cu manera Arias a menciona nan ta comparti pa inspira otro studiantenan cu ta na Aruba of afo, cu nan por atende tambe pa motibo cu nan actividadnan ta online pa asina por tende kico ta nan experiencia di studia na UA y kico nan a haci despues como profesion y como proyectonan di bida tambe.

Esaki lo ta cuminsa 7or te cu 9or di anochi, na unda lo tin diferente orador, di 6 pa 8 graduado di OGM, di 4 pa 5 profesional den area di sector priva of publico relaciona cu nan programa na unda nan lo splica kico ta nan expectativa pa cu studiantenan actual, specificamente ora nan ta bay traha, ora nan ta haci nan pasantia y tambe algun actividadnan cu nan mester confirma cu ta actividadnan di oportunidad di carera cu un organisacion na Aruba cu tambe lo ta den e anochi ey.

Pa por haya informacion riba e Facebook page di OGM: University of Aruba: Organization, Governance and Management. Tambe por haya e link pa y QR code pa registracion riba nos pagina di Facebook. Por sigui nan tambe riba Instagram @ogm_ua.