Universidad di Aruba ta evaluando plan di expansion den bisindario y via programa na distancia

E tipo di acuerdo cu Universidad di Aruba (UA) a firma cu Maastricht University ta un señal evidente cu nos Alma Mater cada dia ta hayando mas forsa, crecemento  y mas reconocimento internacional.

Rector di AU, Dr. Glenn Thode a declara na Bon Dia Aruba cu e plan di expansion di universidad t’ey. Segun Dr. Thode, awendia nos ta mira cu e cantidad di programa y di studiante cu nan tin den nan universidad ta hopi mas grandi, cu tempo pasa. Nan ta wak cu espacio di expansion pa tras di universidad ta chikito, esey ta pone cu nan mester pensa riba plannan di expansion. Actualmente nan tin 700 studiante loke ta un number basta stabiel pa e ultimo tres aña. E ta un cantidad cu lo por subi si UA ta expande nan programanan, manera nan tin plania di haci.

“E plannan t’ey. Nos no a oficialisa nan mes ainda, ya pa un tempo caba nos ta den dialogo cu diferente actornan den nos comunidad cu tin edificionan cercano”, el a bisa. UA ta evaluando kisas si nan por yega na un acuerdo cu e doñonan di propiedad bisiña. Di e forma aki nan por expande e universidad den espacio nan alrededor di unda nan ta actualmente. Dr. Thode su opinion ta cu universidad mester keda den vecindario di Playa.

El a splica cu nos por mira den otro ciudadnan cu universidadnan ta expande den pida nan cercano loke ta crea hopi actividad rond di universidad.

“Mi ta spera cu den futuro nos lo yega na expansion di nos Universidad. Nos ta trahando hopi duro riba dje”, el a declara.

Ainda nan no tin nada concreto pa nan por bisa cu esaki a logra. Pero en berdad e ta haya cu esaki ta un caminda cu nan mester cana, esta e caminda cu nan lo por expande fisicamente.

E otro caminda cu nan ta evaluando ta esun pa nan ofrece programanan na Ingles yama blended. Nan por combina studio na distancia, esta studiantenan no mester bin sinta fisicamente  na universidad pa haci parti di studio. Aunke tin un parti si unda mester tin contacto cu nan, pero di e forma ey nan por sirbi mas studiante cu mesun espacio.