ORANJESTAD – Universidad di Aruba, hunto cu universidad Prince Edward di Canada y universidad di Malta, ta organisa e prome Conferencia Internacional Pa Islanan Chikito, cual lo tuma luga 26 te cu 29 di maart.

Dr. Jim Randall, kende ta profesor di Universidad di Prince Edward pa estudio di Isla, tambe ta un president di instituto di estudio di Isla cu ta involucra investigacion den problema concerni cu nan isla, y otro isla rond di mundo.

Tambe e ta coordina programa di estudio pa master, y ta un vice president di UNESCO den estudio di isla y sostenibildad. Su proposito como vice president ta pa crece den capacidad ora tin problema riba un isla.

Randall ta splica cu ta importante pa hende compronde e importancia di un isla, cu esaki ta diferente cu un pais. “Nos ta haci cosnan diferente, nos kier pone hende compronde cu problema cu ta existi na un pais ta diferente cu problema di un isla.”

Un diferencia cu el a menciona ta cu mayoria di biaha ta tende cu isla ta vulnerabel den casonan di desaster natural manera horcan, of tormenta. Isla ta limita, e capacidad pa contesta lihe ta poco, esey ta un reto cu un isla ta confronta cune. Den un pais esaki ta diferente pa motibo cu tin mas espacio unda hende por bay lihe, pero den isla no.

E ta agrega cu con un isla ta enfrenta cu cierto problema asina. “Nos mester ta cauteloso pa no cay den e trampa di vulnerabilidad, nos ta pensa cu pasobra nos ta isla nos no por yuda nos mes, pero por haci investigacion cu por yuda.”

E ta continua splica cu hende ta purba soluciona problema di un isla mescos cu ta soluciona di un pais, ‘anto esey ta crea mas problema’. Locual nan kier logra ta conecta hende. “Nos ta facilita, nos ta trece hende hunto rond di mundo, pa asina nan tin derecho di conta nan mesun storia y cu hende por tende nan stem. E conferencia ta aki pa motibo cu nos ta kere cu islanan ta importante, no pa nan desaroyo so, pero e lesnan cu nan por comparti cu otro islanan y paisnan.”

Con un isla ta ser goberna, cu por siña di dje y aplica na otro pais. Randall ta bisa cu esey ta mayoria di biaha e pensamento di un isla den un estado di independencia. “Aruba y Prince Edward ta semi autonomo, teniendo un relacion cu otro estado y otro gobierno.”

Segun Randall, e islanan aki ta mustra invisibel. E punto ta pa haci e islanan ‘manera Aruba mas visibel’. E proposito di e conferencia aki ta pa trece entre 80 pa 90 hende rond di mundo, cu lo duna charla y nan investigacion cu a tuma luga na nan isla.

E ta agrega cu ta importante pa hende di Aruba ta envolvi pa ‘nos siña di Aruba’ e reto cu Aruba ta confronta cune, y cual ta solucion cu a yega di tin pa soluciona problemanan asina. “E oportunidad ta pa tur studiante, nan ta e grupo cu lo hereda e problema y resolve esaki”, Randall a splica.

Glenn Thode, rector di Universidad di Aruba, a splica cu na 2017, Randall a acerca Thode pa asina organisa e conferencia na Sint Maarten, pero na e mesun aña horcan Irma a asota e isla ‘treciendo un daño enorme na infrastructura di e isla’, pa locual ‘mester a wanta e conferencia’.

Thode a bisa cu tur hende tin un rol pa hunga den mundo. “Con hende ta biba cu otro y ta goberna nan bida y interactua cu nan ambiente, ta pa e motibo aki Universidad di Aruba a yuda organisa e conferencia, hunto cu comite di universidad Prince Edward.”

Agregando cu tur cos a bay ‘suave’ y cu cada isla ta yuda otro pa realisa e plan aki. E invitadonan internacional lo yega e siguiente dia pa cuminsa cu registracion y recepcion. E programa mes ta cuminsa mañan. “Nos kier nos invitadonan comparti nan storia di e region cerca di Aruba cu nan mesun situacion y condicion. E enfoke di isla chikito na paisnan grandi.”

Riba diahuebs, lo tin un evento habri pa publico general di 7:30 pa 9:30. Esunnan cu tin interes mester registra riba e website di Universidad pa motibo di luga limita.