ORANJESTAD – Ayera durante un conferencia di prensa na Universidad di Aruba a presenta oficialmente e encuesta online tocante ‘Percepcion, Opinion y Actitud tocante Abuso Sexual Infantil na Aruba’.

E encuesta a ser crea pa sra. Clementia Eugene, cu ta docente di e universidad, y esaki ta forma parti di su investigacion como candidato pa doctorado na Universidad di Aruba y Universidad Anton de Kom di Surinam, den colaboracion cu Departamento di Asuntonan Social y Social Crisis Plan.

E investigacion a ser presenta pa sra. Mieke de Droog cu ta Vice Decan FAS, docente y investigado di Universidad di Aruba, ken a expresa cu e investigacion ta hopi importante, pa motibo cu nan como investigado por haya sa mas datonan y por tuma mas medida, specialmente cu tur cos cu ta sosodiendo tocante e tema aki y cu tur e medidanan di e Social Crisis Plan.

Eugene a manifesta cu e investigacion tin tres fase, e prome fase ta e estudio di prevalencia di abuso y negligencia infantil na Aruba; e di dos fase abuso sexual di mucha, pa cual tin dos metodologia, un encuesta online y un discusion den e ‘grupo enfoca’; y e di tres fase ta e experiencianan di adultonan cu a trata cu abuso sexual infantil .

E encuesta tin e proposito di explora e percepcion, opinion, y actitud tocante e abuso sexual di mucha na Aruba, pa determina e impacto di abuso sexual di mucha riba nan capacidadnan, y e potencial impacto riba e desaroyo humano di Aruba.

Tambe el a bisa cu esaki lo por influi den e concepcion di infancia, incidencia, prevalencia y impacto riba e victimanan. Di mesun manera e investigacion lo contribui pa formula miho e servicio y programanan di prevencion, y asina por yega na un intervencion specifico, locual hopi biaha ta culturalmente sensibel pa proteha e muchanan y duna apoyo pa e miembronan di e famia.

Eugene a splica cu e beneficionan ta pa compronde e abuso sexual infantil di un miho manera, obtene informacion pa diseña un maneho y servicionan cu programanan di intervencion dirigi tanto pa esunnan cu a sufri daño, como esunnan cu a causa e daño.

Manera el a comenta, tur encuesta tin un riesgo, ora e persona ta haci e encuesta riba e website lo por haya algun incomodidad pa contesta algun pregunta. Pero tambe Eugene a comenta cu e persona por salta e pregunta y contesta esunnan cu e ta desea, asina tambe por stop di yena e encuesta na cualkier momento.

E encuesta ta disponibel den cuater idioma, Papiamento, Spaño, Ingles y Hulandes. E participante por ta tur hende cu un e-mail adres, mester tin mas di 18 aña y cu actualmente ta biba riba e isla. E informacion lo bay keda confidencial, no lo menciona nomber ningun caminda, y mas ainda, no ta posibel pa identifica e persona cu a participa.

E encuesta riba e website http://www.poa-csa.org tin un duracion di 30 minuut. Eugene a splica cu ta hopi importante pa si e personanan lo kier preveni e abuso sexual infantil na Aruba, bisando cu ‘esaki ta e unico manera cu nos por soluciona e problema aki’. E topico por ta un poco sensitivo, tambe a referi cu si un hende mester di ayudo of lo kier tuma contacto cu Eugene, lo por haci despues di yena e encuesta riba e website ey.

Pa finalisa, Eugene a bisa cu el a haya e motivacion pa haci en investigacion aki pa via cu el a traha cu hopi hobennan y adulto na Aruba y na Saint Lucia, el a experiencia hopi caso di abuso sexual, e berguensa y tabu di e personanan afecta ta haci cu nan no ta busca ayudo, e personanan afecta ta carga e peso pa hopi añanan di nan bida.

Esaki ta pa educa e pueblo di Aruba pa papia di e tema delicado aki, mientras mas victimanan ta Sali for di e tema aki, mas por kibra e silencio.

E resultado di e encuesta lo por ta cla pa luna di mey of juni, tambe lo por extende te luna di juli, pa januari di otro aña nan lo por publica e resultado di investigacion aki.