Ayera mainta a tuma luga e ceremonia di apertura di e tayer Caribbean Postal Union Electronic Advanced Data and Customs Declaration System organisa pa United States Postal Services (USPS), Universal Postal Union y Caribbean Postal Union. Esther Gomes, International Relations Exectuive di Post Aruba NV, a splica Bon Dia Aruba mas tocante e tayer aki y kico e meta di esaki ta.
Aruba tin e honor di ta anfitrion di e tayer ki cu lo tuma luga den e transcurso di e siman aki. USPS, Universal Postal Union y Caribbean Postal Union a uni hunto pa asina trece diferente participante di un total 22 isla di region di Caribe pa yega Aruba y participa den e tayer unda cu nan lo haya training di locual ta e plataforma cu USPS a crea pa nan traha cu Electronic Advanced Data.
Gomes a splica cu Electronic Advanced Data ta importante pa e interes di Merca pa motibo di nan legislacion di e Stop Act. Esaki ta rekeri cu tur post kantoor rond mundo mester usa e plataforma aki pa asina manda informacion electronico avansa pa USPS pa asina haya aprobacion prome cu e paketenan sali for di e pais di origen.
E meta di USPS, segun el a indica, ta pa organisa e tayernan aki den tur region rond di mundo. Esun di Latino America a tuma luga caba na Miami y Aruba ta e anfitrion pa e region di Caribe. Asina USPS lo sigui den e region Africano y Pacifico, etc. cu e tipo di tayernan aki pa capacita tur oficina postal cu e conocemento necesario.
Gomes a agrega cu e interes di Merca ta pa percura cu ningun pais ta den incumplimento. Usando nan propio fondonan, USPS a financia e participacion di cada participante di Caribe, cubriendo nan tickets, estadia y e evento den su totalidad. “Esey ta demostra con importante nan ta haya e tema aki y tambe cu no tin ningun excuus pa bo ta den incumplimento pasobra na momento cu e Electronic Advanced Data drenta completamente na vigor, nan no lo ricibi pakete di e pais si e no ta den cumplimento”, el a remarca.
E sistema di Electronic Advanced Data en realidad e ta na vigor caba, pero segun Gomes ta indica, USPS a tuma nota cu hopi pais no tin e capacitacion necesario y a tuma e decision pa crea e plan aki pa asina duna algun pais un periodo di ahustacion pa asina nan percura di nan mesun banda cu nan ta ricibi e training.
E motibo pakico a scoge Aruba entre tur otro isla pa e tayer aki, Gomes a subraya cu ta pasobra Aruba ta un pais cu ta participa den tur e forum y reunionnan pa loke ta trata desaroyo postal di Caribe. Director di Post Aruba NV, Sr. Guillermo Raymond tabata Secretario General di e Caribbean Postal Union y esey a pone Aruba den un posicion cu na momento cu USPS a indica cu nan ta bay organisa un tayer den Caribe, Post Aruba NV a pone Aruba como pais anfitrion.
“Pa Aruba, specificamente pa Post Aruba, pa ta anfitrion di e tayer aki cu ta di gran importancia pa Merca ta un honor.”, Gomes a expresa.
Durante e ceremonia di apertura director di Post Aruba NV, Guillermo Raymond, a dirigi algun palabra y a gradici tur presente pa tuma tempo pa ta na Aruba y participa den e tayer di gran importancia. “Nos ta spera cu boso por siña hopi durante e siman aki y cu e tayer ta uno productivo”, el a bisa.
Raymond a subraya cu tin tres motibo importante pakico e tayer aki ta tuma luga: prome ta pa enfoca riba un acercamento strategico pa e maneho di Electronic Advanced Data and Customs Declaration System, pa aplica e siguiente stapnan den e region di Caribe pa loke ta trata e sistema electronico avansa aki y pa revisa e situacion individual di cada operador di post.
Na final di e tayer, el a enfatisa, e participantenan lo a gana conocemento valioso relaciona na Electronic Advanced Data y relaciona na informacion di siguridad postal.
“Aunke e tema den cuestion ta tecnico, bo participacion den e tayer aki ta un gran stap pa data y digitalisacion di e desaroyo postal di nos region. Nos ta progresando, pero mester bisa hopi slow compara cu economianan mas desaroya y aunke tin biaha e ta sinti cu nos ta keda atras, laga nos sigui pusha pa dilanti cu determinacion y perseverancia pa cera e buraco den desaroyo”, el a remarca.
Minister di Asuntonan Economico, Comunicacion y Desaroyo Sostenibel, Geoffrey Wever como invitado tambe a dirigi un discurso na tur presente. “Cambio ta pasa, nos no por stop e pero nos por acept’e pa e traha na nos fabor”, el a bisa. “Acepta cambio kiermen cu nos no ta wak cambio como un adversidad, pero como un oportunidad pa mehora nos mes y purba cosnan nobo”.
El a recorda cu e pandemia tabata un catalisado pa cambio y implicacionnan di e circunstancianan di e pandemia di Covid-19 lo rekeri ahustenan continuo y reforma di politicanan di e gobiernonan.
“Mundo a cambia, e servicio postal di Caribe ta na un crusada, incluyendo Aruba Post NV y nos mester scoge transformacion of bira irelevante, pero na mesun momento nos mester keda positivo pa loke ta nos situacion actual”, el a destaca.
Minister Wever a apunta cu e pandemia a afecta y ta sigui afecta tur e economianan y cu e guera na Ucraina ta agregando mas gasolin na e desafionan logistico cu ya caba ta existi. Pero na mesun momento el a subraya cu tur persona mester haci di nan parti pa yuda e gobiernonan fortalece e economianan.
El a enfatisa cu ta responsabilidad di cada persona pa haci tur cos den nan poder pa haci e oficinanan di post mas relevante pa e usuarionan, ofrece producto y servicionan nobo cu e publico kier y tin mester di dje y yuda reduci e subsidio premira pa e gobiernonan local.
“Mi ta aplaudi e iniciativa aki di USPS y Post Aruba NV pa trece hunto lider y expertonan den e sector di post pa duna conocemento profundo den e desafio- y oportunidadnan di nos sistemanan di post”, el a expresa.
